Lahug, Cogon Pardo di moapil sa parade

Di na mosalmot sa Sinulog Grand Parade karong Enero 21 ang Barangay Lahug ug Cogon Pardo gumikan sa kakuwang sa ilang pundo aron ikalahutay sa ilang pagbansaybansay.

Kini ang gikompirmar ni Konsehal Dave Tumulak, chairman sa executive committee sa Sinulog Foundation Inc. (SFI), human nipahibawo ang ilang mga organizer.

Ang duha ka barangay nakaapil pa sa Sinulog sa Barangay sa Dakbayan (SBD) niadtong Dominggo diin ang Barangay Apas maoy nikampiyon sa ritual showdown ug nibulsa sa P350,000.

Gumikan niini, moabot nalang ngadto sa 18 ka mga contingent gikan sa SBD ang mosalmot sa grand parade karong adlawng Dominggo diin salmotan sa laing pito ka contingent gikan sa lalawigan sa Sugbo ug laing upat gikan gawas sa probinsya.

MISA GIUSWAG

Inay alas 7 sa buntag giuswag ang pontifical ngadto sa alas 8 gumikan sa rason may labot ang seguridad.

Matod ni Tumulak nga human sa dul-an usa ka takna nga misa, si Mayor Tomas Osmeña ang mamulong aron pormal nga ideklarar ang pag-abli sa Sinulog 2018.

Pagasundan kini sa pagsugod og sayaw sa 29 ka mga contingent, pagdagan sa mga float ug paglakaw sa mga puppeteers ug higante.

Gipaneguro ni Tumulak nga di maapektuhan ang performance sa mga contingent sa pag-uswag og oras sa misa ug matod pa niya on target gihapon ang oras sa pagkahuman sa Sinulog nga gikatakda sa alas 4:30 sa hapon.