Zombie drugs

Dili tiaw ug makapaalarma sa publiko kining gikataho nga posibling ania na sa Sugbo kining bag-ong matang sa ilegal nga drugas nga gitawag og Zombie drugs. Kini mitumaw sa dihang duha ka mga negusyante ang nangasikop sa mga tinu yanan sa balaod. Ang Regional Drug Enforcement Unit ug ang Regional Special Operations Group sa Central Visayas, sa ilang hiniusang operation, miaresto nila ni Neil Benjamin Yap, 33, ug Richard Ngo Go, sa R Suites Cafe sa A.C. Cortes Ave. sa dakbayan sa Mandaue niadtong Enero 12. Si Go mao ra sab ang tag-iya sa hotel.

Nakuha gikan ni Go ug Yap ang mga nagkadaiyang kapsula nga gituohan nga mga nagkalainlaing klase sa ecstacy. Giingon nga kining maong drugs sagad karon gipanggamit sa mga batan-on ilabi na og may mga okasyon.

Isagol lang kini sa ilimnon ug pipila lang ka mga minutos moepekto gilayon kini nga daw sa mangurog ang nakainom ug morag Zombie ang linihukan.

Dako usab ang posibilidad nga mahunosan sa kinabuhi ang hingtundan kon dili makasugakod ang resistensiya sa panglawas.

Ang makapalarma og samot kay bisan kadtong dili gustong mogamit niini mahimo gihapong mabiktima kay isagol ra man ni sa ilimnon.

Kon ikaw matapo sa grupo, aw dili kalikayan nga makainom usab ka sa gitagay nga sinagulan og Zumbie drugs. Sagad ni mahitabo kon dunay dagkong party.

So kay tinguha man kaha ni Mandaue City Mayor Luigi Quisumbing nga mapakgang kini diha sa iyang balwarte, angay sab siguro niya hunahunaon kining iyang pagpang-aprub sa mga party festival sa iyang dapit ilabi na ning naghinangat nga Sinulog, sama niining Lifedance Festival karong Biyernes.

Duna pa ra bay lain duha nga nag-apply og permit.