Bisan di bayot

Dear Noy Kulas,

Tagoa lang ko sa name nga Dik, college student sa usa sa mga university sa Cebu.

Kining akong problema parte ni sa akong sex nga nasaypan. Maalaan ko nga bayot ug sungugon kong bayot bisan lalake ko. Sukad pa ni sa elementary nga sungugon ko nga bayot kay mokiay kiay lagi kuno ko kon maglakaw. Bisan manulti kuno, bayuton na ko.

Sayop ang ilang pagtuo kay kon attraction ang basehan, di ko ma attract og lalake, babaye hinuon especially sa kanang nindot kaayo og body nga akong i fantasize.

Ang problema nako, Noy, kay kon manguyab ko og babaye kataw-an ra ko kay lalake kuno ang akoa. Pait kay ganahan kaayo ko sa girl ug feel sab nako nga mutual ang feeling, pero basted ko pirme. Unsa may imong ikatambag nako, Noy? Naa kaha ni solusyon ang akong problema? Salamat. DIK

Dik.

Ambot bitaw ning mga tawo, kon unsay imong linihukan, maoy ilang basehan nga bayot ang tawo. Kasagaran sab gyud hinuon, sakto ang perception kay tagsa rang lalake nga mokiay nga di bayot. Naa gani bayot nga maayo motago, maora sab og lalake manulti ug manglihok, pero hatagan nimog opportunity, mopakita gyud. Kaniadto bitaw sa bag-o pa kong nag-college kay naalaan kong bayot. Ang akong mga suod mangatawa ra kay kahibawo man silang di tinuod.

Advantage hinuon nianang imong sitwasyon mas makaila ka among them kinsay maayo ang pagkatawo nila kay moladlad na sa tinuod kay nagtuo silang way mawala nila kay higala ug bayot ka. Mao nay ilang pagtuo. Ang downside lang sab lagi, kataw-an ka kay nagtuo silang bayot ka.

Usba ang imong ways. Kon medyo mokiay ka, nga basin tungod kay na-influence ka sa imong environment kaniadto, i-try o paninguhaa nga di ka na mokiay. Mas maayong makigbarkada ka og mga lalake. The more ka nga makigsuod og mga babaye, the more nga di ka katuohang di bayot ug ma influence og maayo ang imong panglihoklihok.

Eventually, duna ray babaye nga motuo nimo labina kon ipakita mo ang attention kaniya ug sigehan nimo og kombinser nga di ka bayot.

NOY KULAS