Dust in the wind

Bisag milabay na ang pipila ka mga adlaw sa paglubong ni Graldine, apan naapektohan gihapon si Kier. Kanunay siyang maghinuktok sa eskol labi na sa among klasrom. May mga higayon nga sikhon ko siyag hinay sa iyang kilid kay tan-awon siyag dugay sa among propesor. Mituyo gyud kog tapad niya sa matag subject namo.

“You should to move on, Kier. Yes, sakit nga nawa’a siya nimo. But you must face reality nga gikuha na siya gikan nimo. Way makasupak sa kagustohan sa Diyos.”

Mikupot ko sa bukton ni Kier. Gusto kong ipabatyag niya nga nia ko, andam mounong sa iyang mga kaguol ug kanunay magdasig kaniya. Di ko na kalimdan ang akong kaugaingon. Na-in-love ko kang Kier.

Wa motubag si Kier. Wa gani siya motan-aw nako. Hinay lang ang among paglakaw sa sidewalk sa downtown. Hapon niadtong tungora ug gikan mi sa eskuwelahan. Nagpaingon mi sa tagsa-tagsa ka boarding house nga among gipuy-an.

Nagpanglingo si siya nako.

“Ang pagkamatay ni Geraldine di maoy katapusan sa kalibutan, Kier. Kon naguol ka karon, sure ko nga sa mosunod nga mg adlaw magmalipayon Kier. Mitan-aw ka na sab. Ang importante, dawaton mo ang nahitabo ni Geraldine.” Nagkupot gihapon ko sa bukton ni Kier.

“Di ingon ana kadali ang gusto mong mahitabo, Belinda. Dugay na kaayong panahon nga nagkasuod ang among pagbati ni Gealdine sa usag-usa. Sukad pa sa among pagka bata. As I’ve said, childhood sweetheart ko si Geraldine. Buotan siya. Caring kaayo siya nako. She’s very sweet to me.”

Nakapanghupaw ko. Nabatyagan ko ang kadako sa gugma ni Kier kang Geraldine. Hilom kong nangigi kang Geraldine bisag patay na siya. Hilom kong nagselos kaniya.

“Pasagdan ko ang panahon, Belinda, nga ingon ako ani, kon kanus-a nga madawat ko ang giingon mong reality.”

Wa na lang ko magtingog. Nasabtan ko nga di angay pugson si Kier sa gusto kong mahitabo. Husto man sab siya. Di dali para niya ang paghikalimot kang Geraldine. Hangtod sa pag-abot namo sa akong gipuy-ang boarding house, nagkupot gihapon ko sa bukton ni Kier. Gihatod gihapon ko niya sa akong gipuy-an.

“Someday, maybe mahitabo ang imong gusto, Belinda.”

Unya mibiya si Kier nako.

(TAPUSON SUNOD GULA)