Mga dalaga nga nag-zumba

Mipaturatoy pagdagan silang Binog ug Ogok kay gigukod sa mga pulis nga nagpahigayon sa ilang Oplan Tukhang. Nahisum-ok sila sa kalibunan sa di nila pamilyar nga lugar aron di sila madakpan. Mihunong sila dihang natino nila nga wa na makagukod ang mga pulis. Gitagamtam nila ang kakutas ug kakulba. Gipanguha nila ang mga amorsiko nga nanagmaya pagpilit sa ilang mga sinina.

Gitan-aw ni Binog ang iyang relo de pulso. Tungang gabii na. Nabati nila ang kahayahay kay anaa diay sila sa pinuy-anan sa mga patay. Nakita nila ang daghang mga gagmay nga krus. May dako kaayong krus nga giugbok sa yuta. Ang mga kuwaknit naghadyong pagpanglupad. Gipanlimbawotan na pod sila sa ilang balhibo.

Unya may nadunggan silang mga tingog sa mga babaye. Ila kining gisubay paglakaw uban sa mahadlukong mga lakang ug nakita nila ang mga babaye nga diha sa hawanan sa menteryo nga nanagsayaw dinuyogan sa tukar gikan sa CD player.

“Uy, hala! Mga dalaga nga nanag-zumba, Bay Binog,” ni Ogok nga mipaak dayon sa iyang ngabil.

“Oo. Mga seksi kaayo, Bay Ogok,” ni Binog nga mitulo dayon ang laway, morag tawong irong-buang.

“Puti ug hamis kaayog pamanit, Bay,” ni Ogok nga misudlot ang mga mata nga nagtan-aw sa mga dalaga.

“Ilang edad morag naa pa sa ‘dise’, Bay,” ni Binog nga nagpanilap.

“Ekak ta ni daan atong mga armas, Bay,” ni Ogok nga mikuot sa atubangan sa iyang shorts

“Sige, Bay,” ni Binog nga misuon sa gibuhat ni Ogok.

Nalimtan nila ang ilang kakutas, kakulba ug kahadlok, Naghari sa ilang galamhan ang kahinam, kahinam nga usa diay ka hinampak.

Nakalingi ang mga dalaga nga nakabantay sa kasikas nilang Binog ug Ogok sa ilang pagduol.

Minganga ang baba ni Binog dihang nakita ang mga panagway sa mga dalaga.

“H-H-Hala, Bay Ogok! Ang mga zumba girls! Tan-awa!” nakasinggit si Binog.

“U-U-Uy! Nahimong mga zombie girls!” ni Ogok nga mitan-aw sa mga luspad nga mga panagway sa mga ‘zombie’ sa menteryo nga hinay-hinay nga miduol kanila samtang gituy-od ang mga kamot.

“Managan ta, Bay! Managan ta!” singgit ni Binog nga mikaratil pagdagan paingon sa gawas sa menteryo.

“Huwata ko, Bay!” singgit ni Ogok nga paspas pa sa kabayo nga miagpas kang Binog.

Sa kahilom sa tungang gabii may duha ka tawo nga daw nagginukdanay. (KATAPUSAN)