CELTICS GITUHIK SA PELICANS

Nagpakatap og 45 puntos ug 16 rebounds si Anthony Davis aron pangulohan ang overtime nga kadaugan sa New Orleans Pelicans batok sa host Boston Celtics, 116-113, kagahapon sa National Basketball Association (NBA).

Nidugang og 23 puntos si Jrue Holiday alang sa kadaugan, niamot og 19 puntos ug 15 rebounds si DeMarcus Cousins samtang nitunol og 15 puntos si Ian Clark.

Dihang ningbahar ang three-point shooting sa Celtics sa overtime, ang gidak-on sa lineup sa Pelicans ningpatigbabaw hilabi na sa krusyal nga bahin.

Ang Celtics gipangulohan ni Kyrie Irving pinaagi sa iyang 27 puntos, nihatag og 16 puntos matag usa sila si Marcus Smart ug Jaylen Brown samtang nidugang og 14 puntos si Al Horford.

Sa Orlando, nimugna og iyang season-high 32 puntos si Evan Fournier aron agakon ang host Magic ngadto sa kadaugan batok sa Minnesota Timberwolves, 108-102.

Ang Magic nakapupo og 35 puntos sa 4th quarter nga maoy nagpadaog kanila.

Ang Timberwolves gipangulohan ni Jimmy Butler pinaagi sa iyang 28 puntos.

Sa Denver, nimugna og 29 puntos ug season-high 18 rebounds si Nikola Jokic aron pangulohn ang kadaugan sa host Nuggets batok sa Dallas Mavericks, 105-102.

Kuyaw sab nga nakaduwa alang sa Nuggets mao sila si Gary Harris ug Will Barton, kinsa nagkumboya og 47 puntos.

Samtang sa Portland, nipupo og 31 puntos si Damian Lillard samtang nidugang og 27 puntos si CJ McCollum sa kadaugan sa host Trail Blazers batok sa Phoenix Suns, 118-111.