9-ball king pakyas sa unang adlaw sa Sinulog billiards

Napakyas ang kasamtangang world 9-ball champion nga si Carlo Biado pagsulod sa final 16 sa unang adlaw sa dinumbolay sa Jancor Promotion 2018 Sinulog Cup 10-Ball Open Billiard Tournament sa miaging gabii sa Jancor Billiard Hall sa dalan Manalili, likod sa Gaisano Main.

Human niya nalutsan ang premiro niyang tahas, si Biado, kinsa taga Quezon City, nasugamak sa 5-7 nga kapildihan batok kang Oliver Villafuerte sa Digos City nga maoy nagpalagpot kaniya sa unang adlaw sa kompetisyon.

Hinuon aduna pa'y kahigayunan si Biado nga makataak sa top 16 gumikan kay aduna ma'y upat ka mga adlaw nga

elimination round ang torneyo diin upat ka mga bilyarista ang kuhaon matag adlaw.

Si Villafuerte unang nakaarangkada ug nakaposte kini'g 6-2 nga labaw sa race-to-7 nga sangka.

Kargada ang dughan sa usa ka world champion, migukod si Biado ug nakasikit kini, 5-6. Apan wala damhang na

scratch ni Biado ang bolamano ang ika-12 nga rack naghatag og kahigayunan kang Villafuerte nga humanon ang duwa.

Si Villafuerte lakip sa upat ka mga bilyarista nga nakahiluna na sa top 16 kauban sila si Diondel “Monkey” Raga sa Talisay City, Bebeng Gallego sa Bacolod City ug Bots Augusto sa Lapulapu City.

Ang torneyo, nga nagdalit og P200,000 nga kinatibuk-ang ganti, gipasiugdahan sa tag-iya sa Jancor Billiard Hall nga si Allan “Toryaw” Cortes.

Ang kampiyon makadawat og P100,000, makaluklok og P30,000 ang 2nd placer, P15,000 sa 3rd placer ug P10,000 sa 4th placer.

Ang 5th ngadto na sa 16th

placer makadawat sab og ganting salapi.

Ang bayad sa rehistrasyon nagbalor og P1,500 samtang P1,000 alang sa re-entry.

Alang sa dugang mga detalye, mahimong motawag sa 0906-2050502.