Misyon ni Hon. Guardo
Wala pa man tuod kaayo dugoki sa mga Sugboanong basketball fans, apan ang bag-ong natapos nga 2018 Cebu City Sinulog Cup basketball Invitational sa Cebu Coliseum naghatag og positibong marka sa paghibalik dinhi sa Sugbo sa commercial basketball.
Dili nato malimod nga taodtaod nang namatay ang atong commercial league dinhi sa Sugbo nga gani maoy hinungdan kon nganong modayo na lang ngadto sa Kaulohan ang atong mga players kay atoa man didto ang mga lega nga maghatag kanila og oportunidad.
Usa sa pipila ka mga hinungdan niini mao ang panagbangi sa atong mga basketball leaders, pamintaha sa usa ka team ug ingon man ang uga nga pagkadala sa lega, kanang giingon nila nga kinaraan na ug dili na madawat sa mga bag-ong henerasyon.
Atong naobserbahan nga magtikaw-tikaw na lang ang mga semi-commercial league kon dunay mga lungsod nga magpaliga og open tournament ug mao ra kini higayon nga makapanalay ang atong mga players.
Sa niaging Sinulog Cup daw sa nibalik ang kaikag sa mga tawo sa commercial basketball kay gawas sa atong mga beteranong players aduna man usay team nga gikan sa PBA D-League nga mao ang Marinerong Pilipino nga eventually maoy na-champion sa dihang gipildi ang Cebu Landmaster/ Bogo City nga gipanag-iya ni Joe Soberano ug Bogo City Mayor Celestino Martinez sa usa ka kulbahinam nga panag-engkuwentro nga niagi pa og overtime.
Si Cebu City Councilor Jerry Guardo, sa sayo pa, mipadayag nga ang pagbuhi sa commercial league sa Sugbo maoy iyang hatagan og prayoridad ug kadtong Sinulog Cup maoy magsilbing opener sa sunodsunod pa unyang mga lega.
Sa pagkatinuod lang, daghang basketball organizers ang mipadayag nga gustong ibalik ang commercial league sa Sugbo, pero ang nakaapan lang kay way nakasugod. Pulos lang istorya.
Matod ni Guardo nga duna na siyay teamowners nga gikahinabi nga interesadong moporma og teams dinhi sa Sugbo aron pagsuporta nga mahibalik ang commercial league.
Posibling imbitahon usab ni Guardo ang International Pharmaceutical Incorporated (IPI) nga ubos sa pagdumala ni Junpi Castillo ug ingon man ang pamilyang King nga maoy tag-iya sa kanhi RDAK team. Aron paghatag og follow up bag-o lang natapos nga Sinulog Cup, naglaraw na karon si Guardo nga mopahigayon og Mayor's Cup sa bulan sa Abril.
Ning higayona, posibling moimbitar siya og duha ka mga eskuwelahan didto a Kaulohan nga iyang isangka sa mga top school teams usab dinhi sa Sugbo.
Gani ang Adamson University ni coach Franz Pumaren temporaryong nakakomiter na niini. Si Pumaren, maoy kanhi coach sa De La Salle University/Osaka team nga gipanag-iya ni Jonathan Guardo, igsuon ni Jerry, sa dihang miapil sila sa nawagtang na nga Philippine Basketball League (PBL).
Wa usab isalikway ni Guardo ang pag-imbitar og dugang teams sa D-League sama sa Marinerong Pilipino. Akong gikahinabi ang manager sa Marinerong Pilipino nga si Nolet Otayza human nila malangkat ang kampyonato sa Sinulog Cup niadtong Sabado.
Siya mipadayag sa ilang kaandam sa pagbalik dinhi sa Sugbo kon wala lay conflict sa ilang ubang schedules.
Gikalipay kaayo nila ang ilang pagsalmot sa torneyo kay nakahatag kini og dakong exposure sa ilang mga players. Ako nakasiguro nga sa nasinati sa Marinerong Pilipino sa niaging Sinulog Cup daghan pa unyang mga team didto sa Kaulohan ilabi na sa D-League ang gustong moduwa dinhi sa Sugbo.
Dili man tuod madali-dali pagtuman kining tinguha ni Guardo nga pagbuhi og balik sa commercial league sa Sugbo apan, at least nakasugod ug nakapanukad na siya sa iyang katuyoan. But still the next is remained to be seen.