LOMACHENKO VS. PACQUIAO GISABUTAN NA
Mihatag na’g katin-awan si Filipino boxing icon Senator Manny Pacquiao kabahin sa kon unsa’y sunod niyang lakang isip usa ka boksidor nga nagpatong na sa tumoy sa iyang boxing career.
Gitataw sa Pambansang Kamao sa Pilipinas nga bisan sa iyang edad nga 39, wala pa gihapon misantop sa iyang hunahuna ang pulong nga retiro ug nagtinguha pa kining mosagubang og usa ka dakong away.
Ang kampo ni Pacquiao naghimo og lakang aron ikaharong sa kanhi 8-division
world champion ang kasamtangang pound-for-pound king nga si Vasyl Lomachenko sa Ukraine.
“I’m not retired yet. Namimiss ko ‘yung boxing eh,” matod ni Pacquiao sa interbyu ni Karen Davila sa programang “Headstar” sa ANC kagahapon sa buntag.
Si Pacquiao nasugamak sa kontrobersyal nga unanimous
decision nga kapildihan sa labing ulahi niyang away niadtong Hulyo 2 batok kang Australian Jeff Horn sa Brisbane, Australia.
Bitbit ang 59-7-2, 38KOs nga rekord, si Pacquiao nagtinguhang ikaharong niya si Lomachenko karong Abril, sa panahon nga wala’y trabaho sa senado.
“Ang pangako ko sa mga tao, hindi ma-apektuhan ang trabaho ko. ‘Yung April, magandang idea dahil off kami ng March 23 to May 13. So April, wala kaming trabaho,” pasabot ni Pacquiao.
Matod ni Pacquiao nga batok kang Lomachenko, mag
training siya sulod sa tulo ka mga buwan.
Si Lomachenko aduna ra’y 10-1, 8KOs nga rekord apan dili kini maoy basihan sa iyang abilidad.
Una misaka sa professional
rank si Lomachenko, nabaid na kini’g insakto sa amateur
rank diin kausa ra kini napilde sulod sa 397 ka mga away.
Isip professional boxer, nahimong world champion si Lomachenko sulod lang sa tulo ka mga away.
Sa taho sa Las Vegas Review Journal, nagkanayon si Top Rank boss Bob Arum nga gusto niyang moaway si Pacquiao karong Abril 21 sa sama nga boxing card diin magsangka sila si Horn ug Terrence Crawford.
“Pacquiao seems like he wants to come back, so we’re trying to get that finalized,” pasabot ni Arum.
Usa sa angayang husayon aron madayon ang away nila ni Pacquiao ug Lomachenko mao ang isyu sa timbang.
Sa sayo pa, nagkanayon si Lomachenko nga gusto niyang mag-away sila ni Pacquiao sa lightweight division nga adunay weight-limit nga 135 pounds. Si Pacquiao katapusang miaway sa welterweight division (147 pounds).
“There are still talks on the weight, reducing the weight,”
matod ni Pacquiao.