Makapanagana unta

Pipila ka mga adlaw sa wa pa ang dagkong mga kalihukan sa Sinulog 2018, wa pa mopahibawo ang kapulisan nga pagngon ang mga signal sa mga cell site alang sa seguridad sa mga manambong niini. Sugod kagahapon sa hapon, gipawong ang signal sa mga cell site. Bisan tuod duna nay mga hugonhugon nga pagngon ang signal, nagpanagana pa ang ang mga pulis sa pagkompirmar nga duna silay request nga kini pagngon.

Kagahapon, una pa gipahibawo ang pagpawong sa mga cell site dihang gisugdan na ang Solemn Procession. Nagkapuliki ang mga telecommunications company sa pagpahibawo sa publiko pinaagi sa mga sakop sa media ug sa social media sa pagpawong sa ilang mga cell site.

Makasabot ang kinabag-an sa publiko nga alang kini sa seguridad sa mga kalihukan nga gitumong usab sa kaluwasan sa publiko. Apan mas maayo unta kon sa sayo pa, gipahibawo na kining daan aron mapanagan-an sa katawhan.

Daghan ang nagtuo nga di pagngon kay wa may klaro ang pahibawo. Giingon ra sa kapulisan nga kon gikinahanglan, mao kini ang ilang ihangyo sa mga telco ug National Telecommunications Commission (NTC).

Pila kaha ka mga tawo ang nagkabuang kagahapon human mawagtang ang signal ug diha-diha na napahibawo ang publiko kalabot niini?

Hayan dunay wa na hinuon magkakita tungod kay wa na sila magkakontakay kay wa nay signal, labina kadtong mga dayo nga wa makapanagana niini.

Wa may mawala kon ang pagpawong sa signal napahibawo na pipila ka mga adlaw sa wa pa kini buhata. Duna untay contingency nga mga plano nga mahimo kon pagngon na ang signal.

Sa sunod tuig unta, kon ila kining buhaton, ipahibawo nang daan sa publiko ang pagpawong, di kay kalitkalit aron ang tanan makapanagana ug makaandam.