P.8M BALOR SA SHABU NASAKMIT

TAGA JOLO NASIKOP ATOL SA SINULOG

Giingong supplier og shabu sa mga druglord sa Sugbo ug kauban ang nasikop sa RGY, Barangay Banilad, dakbayan sa Sugbo niadtong Dominggo, alas 9:00 sa gabii, diin kapin sa tunga sa milyon ka pesos nga shabu ang nasakmit.

Nasikop sila si Mohammad Roger Asmara Jumadil, 40, minyo, taga Brgy. Alat, Jolo, lalawigan sa Sulu nasikop uban sa iyang gidudahang kakunsabo nga si Mahidi Sawadjaan Hajaral, 46, minyo, taga Brgy. Asturias, Jolo, Sulu atol sa operasyton sa mga sakop sa Philippine Drug Enforcemnt Agency (PDEA) 7.

Sa intelligence report sa PDEA-7, si Jumadil giilang high value target isip supplier sa druglord sa Sugbo ug Central Visayas.

Ang shabu nga gi-supply niini gikan sa igsuon niini nga tua sa nasud sa Malaysia ug ilang ipalusot kan sa Jolo paingon sa Zamboanga City ug ibiyahe pinaagi sa sakyanan paingon usab sa Sugbu.

Ang mga ahente sa PDEA-7 mi-transact kini kang Jumadil og usa ka dakong bulto sa shabu nga motibang sa 50 gramos nga mobalor sa P100,00 gamit ang budol money.

Atol sa buy-bust operation nakuhaan pa sila sa laing tulo ka dagkong putos nga shabu nga nga motimbang sa 200 gramos ug mobalor sa P600,000.

Ang shabu i-supply unta nila ni Jumadil ug Hajaral sa ilang mga druglord nga mi-order nila aron magamit sa mga kustomer panahon sa kasaulogan sa Sinulog 2018.

Si jumadil, nga nahinabi sa Superbalita, nagkanayon nga usa siya ka panday, apan gidapit sa iyang higala nga si “Nining” nga mosaksi sa Sinulog 2018, uban sila ni Hajaral.

Ilang higala si Nining nga taga Astruias, Jolo, gihatagan sila og pamasahe nga P10 mil niadtong Dominggo hinungdan nga misakay sila sa eroplano sa Zamboanga International Airport paingon sa Mactan Cebu, ala 1:20 sa hapon niadtong Domingo apan nadelatar kini hinungdan nga alas 7:00 sa gabii na sila naabot sa Sugbo.

Gihimakak nila nga nalambigit sila sa gidiling drugas sanglit kaniadto lang sila niapil niini apan niundang na.

Sa una suhulan silage 10 mil pesos pagdala lang sa illegal nga kontrabando paingon sa Zamboanga.

Si Jumadil niingon nga usa lang siya ka panday nga gikan sa Malaysia, pero niuli kay gi-deport human nadakpan didto samtang, si Hajaral nagpailang mag-uuma sa ilang lugar ug niadto lang usab siya niapil sa pagpamaligya apan niundang na.

Ang duha mipadayag nga igo lang silang giplitihan sa ilang higala aron moanhi sa Sugbo aron mosaksi sa Sinulog grand parade.

Gipadayag nila nga gusto silang makasinati sa kanindot sa Sinulog nga ilang makita sa mga post sa social media o sa mga balita nga makita.

Apan nakuhang impormasyon sa PDEA-7 si Jumadil, niari sa Sugbo atol sa Sinulog aron mo-deliver sa shabu, ingon man maningil sa mga druglord dinhi nga mga utangan.

Gani ang plite niini sa eroplano ug pag-estar niini sa mga hotel sa Cebu gibayran nang daan sa mga nak-utang nila sa drugas.

Giingong gi-tol ni Jumadil ang pagbiye sa Sinulog aron ma-usa na lang niya’g personal nga makulikta sa mga druglord dinhi sa Sugbu nga iyang utangan.

Sa laing bahin, cellphone technician nadakpan sa buybust alas 3:15 sa hapon atol sa Sinulog sa usa ka mall sa Banilad, dakbayan sa Sugbu.

Si Barry Ege, 46, cellphone technician, buwag sa asawa taga Bakilid, dakbayan sa Mandaue, nasikop sa mga ahente sa PDEA-7 nakuhaag 25 gramos nga shabu nga mobalor sa P150 mil.

Si Ege, nga nahinabi sa Superbalita, niangkon nga namaligyag shabu, apan gisugo lang siya sa iyang amo nga taga Villagonzalo 2, dakbayan sa Sugbo, nga i-supply gihapon nila sa ilang mga kustomer nga mi-order atol sa Sinulog. /