VIC CAINDEC: BAG-ONG HEPE SA LTO 7
Molingkod na sugod karong adlawa ang bag-ong direktor sa Land Transportation Office (LTO) 7.
Si Victor “Vic” Caindec, maoy mohulip ni Alita Pulga, kinsa maoy nahimong officerin-charge sulod sa kapin usa ka tuig sa LT0-7 ug gitudlo isip assistant regional director.
Ang turn-over of command ipahigayon karong alas 10:30 sa buntag sa Cebu Parklane Hotel ug dili sa buhatan sa LTO-7 aron dili mabalda ang ilang frontline services.
Si Caindec nahimong executive director sa Cebu City Transportation Office (CCTO) niadtong Disyembre 2014 hangtod sa Enero 2015 ug atol sa administrasyon ni kanhi Mayor Michael Rama apan ni-resign sanglit gikuha ang iyang serbisyo sa usa ka international company.
Human niadto, nahimo siyang bise presidente sa PDPLaban sa Visayas atol sa kampanya sa presidential election niadtong tuig 2016 ug sila ang nangusog sa Bisaya Napud movement nga maoy nagdala sa kandidatura ni kanhi Mayor Rodrigo Duterte para sa pagka-presidente sa nasod.
Human sa eleksyon, nahimo siyang consultant sa Office of the House Speaker ubos sa pagdumala ni Kongresista Pantaleon “Bebot” Alvarez.
Niadtong Enero 17, si Duterte nitudlo kaniya aron maoy mangulo sa LTO-7 hulip ni Alita Pulga kinsa nahimong OIC- sulod sa kapin usa ka tuig kinsa mao karon ang gitudlo isip assistant regional director.
Ang prayoridad ni Caindec sa iyang pagdumala sa LTO-7 mao ang pagpalambo sa batakang serbisyo sa maong buhatan nga naglakip sa rehistrasyon, pagisyu og driver’s license ug ang pagdakop sa mga malapason sa lagda sa trapiko. /