Mga pilok mikaging nunot sa katugnaw

Nag-post og picture ang usa ka babaye didto sa Yakutia, Russia diin iyang gipakita nga mikaging ang iyang mga pilok.

Bisan ang mga thermometer di makasagubang sa bugnaw kaayo nga temperatura sa Yakutiausa ka rehiyon sa Russia nga adunay usa ka milyon nga mga tawo nga nagpuyo, mga 5,300 ka kilometro sa sidlakan sa Moscow, Russia nga miigo sa minus 67 degrees Celsius sa pipila nga mga dapit.

Samtang ang mga estudyante kanunay gihapon nga moeskwela bisan sa pag-ubos sa minus 40 degrees Celsius ang temperatura.

Apan gikanselar ang mga klase sa tibuok rehiyon ug gimandoan sa kapulisan ang mga ginikanan sa nga di pagawson ang ilang mga anak.

Gipakita sa usa ka TV network sa Russia nga gipanag-iya sa gobyerno sa Russia ang pagubos sa mercury sa thermometer sa lungsod sa Oymyakon, usa sa labing tugnaw nga lugar sa kalibutan nga gipahimutang aron sa pagsukod lamang sa temperatura ngadto sa minus 50 degrees Celsius.

Niadtong 2013, ang Oymyakon naka-record og labing ubos nga minus 71 degrees Celsius.

Duha ka lalaki namatay dihang sila misuway sa paglakaw paingon sa usa ka duol nga umahan human naguba ang ilang sakyanan paglabay sa hinapos sa semana.

Adunay tulo pa ka mga lalaki nga kauban nila ang naluwas tungod kay nagsul-ob sila og mainit nga mga senina, matud sa taho sa mga imbestigador nga gikutlo sa Associated Press. /