Award sa media?
Linaw. Gawas sa tulis sud sa jeepney kagahapon sayo sa buntag, walay natala nga dautan panghitabo atol sa Sinulog Grand Parade niadtong Dominggo. Salamat sa maayong panahon ug sa pagkooperar sa katawhan.
Bisan pa og gi-relieve na si Police General Mario Espino, nga maoy Regional Director dinhi sa PRO 7, atol sa pagsugod sa Sinulog maayo gihapon pagpadagan sa pagsaulog sa pista ni Senyor Sto. Niño.
Si Cebu City Mayor Tomas Osmeña ang miabli sa pagsugod sa Sinulog sa Abellana Sports Complex. Iya usab giabi-abi ang mga bisita sa dakbayan nga mga opisyales sa kagamhanan nasyonal sama ni Labor Secretary Bebot Bello, Defense Secretary Delfin Lorenzana ug Tourism Secretary Wanda Teo.
Tungod sa dako nga pagtuo sa mga Katoliko nga nagdeboto sa Señor Sto. Niño nahatagan og maayo nga panahon ang selebrasyon. Gani, sa mga nanglabay nga bagyo pirmi nahalikay ang dakbayan sa maong katalagman.
Ang maayo nga panahon kagahapon usa sa mga milagro nga di maesplikar apan masabtan sa kadaghanan labina kadtong dunay dakong pagtuo ni Señor Sto. Niño. Pit Senyor!
AWARD. Ang Fake News Awards ni US President Donald Trump ngadto sa US media nga pirmi nga mobira kaniya nakahatag og inspirasyon sa usa ka pulitiko dinhi sa Sugbo. Gani, di na man bag-o ning award alang ni Cebu City Mayor Tomas Osmeña.
Kaniadto pa mihatag na si Mayor Osmeña og “Kalabasa Award” sa usa ka airline tungod kay dili maayo og serbisyo ug pirmi nga uwahi. Sa miaging tuig, miingon si Mayor Tomas nga iyang hatagan og kalabasa
award si Konsehal Joy Pesquera kay, matod pa, nagsige og babag sa mga proyekto ni mayor.
Basin og mohatag pud si Mayor Tomas og susama nga award ngadto sa iyang mga kritiko nga taga media.
Gani, nahimo nga komedya niadtong Biyernes atol sa reunion sa Visayanian Staffers didto sa Ecotech Center, Lahug, nga kon mohatag si Mayor Tomas og susama nga award dawaton ni Bobby Nalzaro.
Ang Visayananian Staffers, nga gimugna ni Atty. Cheking Seares gipangulohan karon ni presidente Atty. Eddie Barrita, dunay reunion matag tuig sa di pa ang Pista Senyor. Si Nalzaro, higala ug kauban sa buhat sa
media, usa sa mga imbitado. Si Nalzaro, nga gianggaan nga Super Bobby, usa sa mga
news anchor sa GMA-7 News ug komentarista sa dySS. Nagsuwat usab siya og lindog sa SunStar Cebu ug Superbalita.
Si Super Bobby ang numero uno nga kritiko ni Mayor Tomas. Gikiha ni Mayor Tomas og libelo si Nalzaro apan nadismis ang maong kaso. Pung pa ni Super Bobby, dag katawa, iyang dawaton ang award ni Mayor Tomas. Kon matinuod ni, makalingaw ni nga balita.