I can’t push my dream anymore
Gipaningot ko pag-ayo dihang nakamata ko. Nagdali kong mibangon. Pagkanindot sa akong damgo, uy, Very sweet kaayo mi si Dave nga nangaligo sa beach. Nagginaksanay mi ug unya misawom mi. Ug sa ilawom sa tubig, naghinagkanay mi sa lips.
Nakapanghupaw ko. Bisag sa akong pagkatulog nahasol ko. Si Dave maoy gipitik kanunay sa akong kasingkasing. Mahunahuna gyud nako siya bisag natulog ko. Mitindog ko. Naghubo ko sa akongtisirt kay nabasa kini sa singot. Gitrapohan ko ang akong lawas sa tualya ug nag-ilis ko og laing tisirt.
“Love na kana, Kresilda. Nalove at first sight ka anang giingon mong Dave.”
Dako kaayog tingsi si Pamela. Silingan nako ug maoy labing suod kong amiga. Gisuginlan ko siya sa tanan nianang pagka ugma kay Sunday.
“Ingon gyud ana ang bation sa girl nga na-in-love, Kresilda. Magdamgo sa laki nga nagustohan.”
“Aw, nasuheto ka na gyud ana, Pam, kay nakasuway ka na mag uyab.”
“Di kay nakasuway lang, Kris. Kadaghan na gyud ko makauyab.pero ning bag-o kong boyfriend, love na gyud nako siya. Di na nako siya ilisan.”
Nahilom ko kay nahunahuna ko ang akong pangandoy nga mag-madre.
“Unya, moinsister ka pa sa imong pagmadre? C’mon, Kresilda.”
Usa si Pamela nga misupak nga magmadre ko. Di kay siya lang. Hasta pud ang akong mga ginikanan. Unsaon, ako ra ang babaye namong magsuon ug duha pa gyud mi. Ako ang kamagwangan.
“Di man igong rason si Dave aron di na nako ipadayon ang akong tinguha nga magmadre, Pam.”
Morag gilimdan ko na lang ang akong kaugalingon. Morag inanay kong nawad-an og interes sa pagmadre tungod kang Dave. Di ko malalis ang giingon ni Pamela nga na-love at first sight ko kang Dave.
Sa akong pagtuo, gugma gyud ang gibati ko ngadto niya. Imagine, kon mahunahuna ko si Dave bation gyud nako ang way pagpakaaron-ingnon nga kalipay?
“Sa giingon ko na nimo, Kris, naay daghang paagi sa pagsilbi sa Diyos. Don’t push your dream!”
“Yap! I can’t push my dream anymore.” Apan ang maong mga pulong wa ko isulti direkta kang Pamela. Sa akong hunahuna lang kini.
Usa ka buntag, nakalitan ko kay nagkadungan mig sulod si Dave sa university nga akong gitunghaan. (SUMPAYAN)