Simul run sa 7-Eleven, Peb. 4

Gidasig sa mga nag-organisar sa 7-Eleven Run ang mga mahiligon sa lumba sa Sugbo sa pagparehistro na ning higayuna sa dili pa mahurot ang luna alang sa lumba nga gikatakda karong Pebrero 4.

Ang lumba dungan nga ipahigayon sa mga siyudad sa Sugbo, Davao ug Manila.

Dinhi sa Sugbo, ang lumba manukad ug masangko ra sab sa Cebu Business Park. Gilauman nga kapin sa 5,000 runners ang mangapil sa lumba.

“Right now for Cebu, I think there are 5,000 runners already registered. There are a lot of out-of-town runners who chose to register here,” pasabot ni local race director Joel Juarez sa Coco Running sa interbyu sa Sun.Star Cebu, igsuong buhatan ning mantalaan.

Gipasabot ni Juarez nga ubay-ubay nga long distance runners sa Luzon ang nakadesisyon nga dinhi sa Cebu managan gumikan kay mas taas kini og cut-off time alang sa 42K. Ang cut-off time sa Cebu leg kay pito ka mga oras kumpara sa Manila nga upat lang ka mga oras.

Gawas sa 42K, ang ubang mga kategoriya njga kombatihan mao ang 21K, 16K, 10K, 5K, 3K ug 500-meter dash.

Naa sab kini tandem race mao ang ang 10K Buddy Run ug 5K Buddy Run.

Si Neville Manauis, kinsa race director sa Ironman 70.3 Philippines, maoy mangulo sa technical team inabagan ni Juarez.

“The team is now ready. We just encourage the runners in Cebu to register now because the slots may run out. I think for Manila-leg, almost all the categories are already closed,” batbat ni Manauis.

Ang mga mananaog sa lumba makadawat og ganting salapi ug aduna sa’y makakuha og kahigayunan nga makasalmot og international race sa Asya nga libre sa tanang gastuhan.