Barangay Ginebra gilatigo sa Aces

Gipahimuslan sa Alaska Aces ang pagpalta sa higanting si Greg Slaughter pinaagi sa pagpukan sa Barangay Ginebra, 97-83, sa nagpadayon nga PBA Philippine Cup niadtong Dominggo sa napuno nga Ynares Center sa Antipolo City.

Ang Aces nakaposte sa ilang pinaakadako nga labaw sa third quarter sa dihang gisugdan nila pagpahamtang ang full court defense nga miresulta sa sunodsunod nga turnovers sa Ginebra.

Apan sa fourth quarter, ang 18 puntos nga labaw sa Aces hinayhinay nga natibhang ngadto sa otso puntos na lang sa dihang nagkumboya sa pagpahagsa sa uwahing rally sila si LA Tenorio, Mark Caguioa, Jervy Cruz ug Thompson.

Hinuon wa kini makalahutay. Si Vic Manuel ang miduslit sa pagpaulbo sa opensa sa Aces samtang si Sonny Thoss ang midominar sa ilawom nga bahin aron pagselyo sa ilang ikatulong sunodsunod nga kadaugan human sa 0-2 nga pagsugod sa komperensiya.

Ang kapildihan mao ikaduhang pildi sa Ginebra kinsa surprisa usab nga gilubong sa Blackwater Elite sa niagi nilang duwa.

Wa makaduwa si Slaughter ug ang laing sinaligan nga si Joe Devance tungod sa tagsatagsa nila ka injury.

Maayo usab nga nakasuporta sa Aces sila si Chris Banchero nga may 14 puntos ug Jayvee Casio ug Alvin Abueva.

Sa sayo pa, gipawngan sa kahayag sa TNT Ka Tropa ang sister-team niini nga Meralco Bolts, 99-81.

Mga puntos:

Alaska (97) - Manuel 18, Thoss 17, Banchero 14, Casio 13, Abueva 9, Teng 9, Cruz 5, Enciso 3, Potts 3, Exciminiano 2, Magat 2, Racal 2, J. Pascual 0 Ginebra (83)-Mariano 15, J. Aguilar 12, Ferrer 12, Thompson 12, Caguioa 8, Cruz 8, R. Aguilar 5, Tenorio 5, Mercado 2, Taha 2, Wilson 2, Jamito 0.