Problema sa Cavaliers

Ambot og naunsa na man ning usa sa akong paboritong team sa NBA nga mao ang Cleveland Cavaliers. Ning mga uwahi nilang duwa yano raman kaayo ni silang ipanglubong sa ilang kontra og tag kapin 20 puntos.

Pero og silay modaog, onepoint ray madag-an unya moagi pa yud og delikadong sitwasyon.

Hinuon bisan pa man sa ilang sunodsunod nga kapildihan, pabilin gihapon silang anaa sa ikatulong pwesto sa Eastern Conference (27-18) nga nagsunod sa Boston Celtics (34-12) ug Toronto Raptors (31-14).

Apan kon mao ni magpermamente natural nga magkaus-os sila sa ilang nahimutangan karon ug peligro pa nga dili madala sa playoffs.

Duna pa silay nahabilin nga 36 ka mga duwa sa regular season ug kon di ni mahatagan og solusyon kining gamayng kalandrakas sulod sa ilang organization posibling motidlom ang ilang paglaom.

Bintaha na lag gamay nga nahitabo ning tungatungang bahin sa regular season kay aduna pay igong kahigayonan nga mahatagan og solusyon ang problema.

Usa sa ilang laraw maonga mabira nila si Lou Williams sa LA Clippers ug andam silang mibaylo ni Tristan Thompson ug JR Smith.

Laing gitan-aw nila mao si DeAndre Jordan sa Clippers bugti ni Thompson. Si Jordan dakog ikatabang sa ilang depensa kay mao ni ilang numero unong problema sa team.

Ilabi na og ang mo- wardiya si Isaiah Thomas, dali ra kaayo malutsan kay maka create man og mismatch.

Si Kevin Love nga gihimong sentro dili na usab kaayo epektibo sa maong position ug gawas niini gihamok usab sila sa mga injuries.

Naobserbahan usab nga ang Cavs karon gilangkuban na sa mga beteranong players kansang mga abilidad nagkaawop na hinungdan nga sila karon ang pinakaedaran mga team sa NBA.

So kon gusto silag trade kanang batan-on maoy ilang punteryahon.

Pero taym pa una. Dili kaha dunay player o mga players nga wa kauyon ni coach Tyronn Lue ug gusto kini nilang papulihan sa management?

Aron makakuha sa sempatiya sa management posibling nagpa goryo-goryo lang ni sila sa ilang dinuwaan.

Ako nahinumdom nga nakalitok si Lue nga adunay sekretong agenda ang pipila niya ka mga players human sa sunodsunod nilang kapildihan. Ultimo si LeBron James wa mohimakak nga posibli kining mahitabo.

Sa dihang gipangutana kon mapapha ba si Lue isip headcoach sa team, way klarong tubag si James ug igong lang mipasumbingay nga dili unta kini mahitabo apan wa siya mahibawo kon unsay desisyon sa management.

Nabantayan sab nga daw si James wa nay respeto sa iyang coach kay mao na may mangasaba atol sa timeout.

Dili bag-o alang ni James kining maong sitwasyon.

Nahinumdom mo atong David Blatt nga bisan og nindtot ang dagan sa team kalit lang nawa sab sa Cavaliers kay wa na magustoi ni James.

So, dako akong pagtuo nga aduna na unyay bag-ong coach ang Cavaliers ning sunod nga mga adlaw. Bisag pustaan pa.