CICC palambuon sa Mandaue
Plano sa kagamhanan sa dakbayan sa Mandaue nga himuong convention space nga adunay commercial development ang Cebu International Convention Center (CICC) karon nga nakabayad na ang dakbayan sa P200 milyones nga downpayment niini sa lalawigan sa Sugbo.
Matod ni Mayor Luigi Quisumbing nga nakakuha siyag mga proposal sa nagkadaiyang pribadong sektor kalabot sa iyang tinguha.
“Well, we are now ready begin entertaining offers, but we’d like to ideally pursue a Public-Private Partnership (PPP) rather than the city government to spend money to be able to demolished and rebuild the structure that is suitable for a commercial development,” matod ni Quisumbing sa mga tigbalita.
Paambit niya nga kon mahimo ang maong plano, buot niyang iprayoridad ang mga biktima sa sunog sa 9.2 ektaryang luna tapad sa CICC alang sa trabaho lakip na ang mga lumolupyo sa Brgy. Guizo, Mantuyong ug Mandaheuhanon sa kinatibuk-an.
“We want to make sure nga mo-benifit gyud sa Development sa CICC ang mga residente sa Guizo ug Mantuyong and the rest of Mandaue as a whole,” matod sa mayor.
Atol sa interbiyu sa mga tigbalita kagahapon, ang mayor nagkanayon nga adunay niduol kaniya nga tulo ka pribadong entidad nga nipadayag sa ilang tinguha sa CICC.
Kon magsugood na unya ang pagpalambo niini, si Quisumbing niingon nga makahimo kini og mga 2,500 ngadto na sa 7,000 ka trabaho. Biktima sa sunog prayoridad. Gitataw ni Quisumbing nga iyang kondisyon sa iyang mga nahimamat nga pribadong entidad nga buot mopalambo sa CICC nga unahon gyud ang mga taga Guizo ug Mantuyong sa pagpatrabaho ilabi na ang mga biktima sa sunog.
Niuyon matod pa ang mga interesado niini, gani, buot ni Quisumbing nga ipaubos sa kursong TechVoc ang mga biktima sa sunog.
Sa pagprayoridad sa mga biktima sa sunog nga makatrabaho sa maong kalambuan.
“We’re prioritizing the fire victims for employment for the new development. We are going to make sure that all of them will have employment opportunities,” sigun sa mayor.
Dugang niya nga ang mamahimo unyang kalambuan sa CICC makamugna og dugang trabaho ug kita alang sa dakbayan pinaagi sa buhis.
Si Quisumbing nagkanayon nga tungang bahin sa tuig bayaran sa Mandaue ang kuwang niining nga P100 milyones alang sa pagpalit sa CICC.