KOLUROM NGA TRAYSIKOL SA TALISAY CITY PANAKPON
Operators sa dul-an sa 2,000 ka kolurom nga mga traysikol sa dakbayan Talisay nga padayong namasahero magbantay kay hingusgan na unya ang pagpanakop kanila.
Kini maoy gipahibawo ni Almond dela Peña, pangulo sa City of Talisay-Traffic Operation Development Authority (CT-TODA).
Gibutyag ni Dela Peña nga sa ilang pagbutang sa mga traysikol, PUJ ug habal-habal sa temporaryong terminal duol sa merkado sa Tabunok, nakaalibyo kinig gamay sa kahuot sa Tabunok area.
Matod niya nga base sa iyang naobserbahan, nikunhod sa 15 porsyento sa mga traysikol ang nibiyahe gumikan kay ang mga kolurom mahadlok na mosulod sa temporaryong terminal.
Matod niya nga mahadlok sila tungod kay kalitan sila og inspection ug masuta nga wa silay prangkisa, samtang ang uban wa ma-renew.
Si Dela Peña niingon nga di lisod ang pag-ila sa mga traysikol nga way prangkisa tungod kay way sticker sa atubangan.
Gumikan niini, hangyuon ni Dela Peña ang taga licensing office sa paglingkod sa temporaryong terminal aron masusi kadtong mga traysikol nga walay prankisa nga mosulod sa terminal.
Sa Talisay, aduna lay 1,800 lang ang gitugutan nga makakuhan og prangkisa apan ang kasamtangang nagdagan niabot na sa 3,500 ka traysikol.
Matod ni Dela Pena, posibli nga kadtong mga traysikol nga way prangkisa di na lang mosulod sa terminal.
Apan di gihapon sila angay mokompyansa tungod kay sila sa CT-TODA mosugod na og atang sa kadalanan aron pagpanakop sa mga traysikol nga kolorum. /