PULIS, KONSEHAL NASIKOP SA CASINO

NAABTAN SA MGA PULIS NGA MIPATUMAN SA MANDO NI PRES. DUTERTE

Konsehal sa lungsod sa Cordova ug pulis sa siyudad sa Sugbo nasikop sa managlahing mga casino sa Metro Cebu kay naatlan nga nagsugal nga hugot nga gidili sa pamonoan ni President Rodrigo Duterte.

Ang mga nasikop giila nga silang Cordova Municipal Councilor Lemuel Wahing Pogoy ug PO2 Cyrelle Marie Bayate, kinsa nadestino sa Parian police station sa Cebu City Police Office (CCPO).

Unang nasikop si Wahing sa City Intelligence Branch nga gipangolohan ni Chief Insp. Police Chief Insp. Mark Gifter Sucalit, inabagan sa Regional Intelligence Division, pasado alas 11 sa milabayng gabii sud sa usa ka casino sa Isla Mactan Hotel.

Kagahapon sa kaadlawon, naaktohan sa mga sakop sa City Intelligence Branch sa Cebu City Police Office nga gipangulohan ni Chief Insp. Christopher Navida ang babaying police nga si Bayate sud sa casino sa Crown Regency Hotel sa Osmeña boulevard, siyudad sa Sugbo.

Matod ni Navida nga nakadawat sila og report nga dunay mga sakop sa pulis nga mosulod sa casino hinungdan nga ilang gipangsubay ang mga balay pasugalan.

Nakuha sa posisyon ni Bayate ang usa ka caliber .38 paltik revolver nga dunay lima ka mga bala ug ang iyang motorsiklo.

Matod ni Supt. Josefino Ligan, officer in charge sa RID 7, nga ang pagkasikop sa duha ka mga government officials kabahin sa kamandoan ni Duterte.

“This will serve as a lesson... Please do stop in going to casinos. The PNP organization will implement the directive of the

President,” matod ni Ligan. Kasong kriminal ug administratiba ang atubangong kaso sa mga dinakpan samtang dugang kaso batok kang PO2 Bayate human siya makuhai og di lisensyado nga armas.

Wa na moluwat og pamahayag si Bayate sa dihang gikuhaan apan si konsehal Wahing mitug-an nga naka check in siya sa hotel ug misuroy lang siya sa casino.

Apan ang CIB sa Lapulapu mipakita sa ilang amateur video nga ilang naaktohan ang konsehal nga nagsugal sulod sa casino.

Ang hepe sa Parian police station Sr. Insp. Narolff Tan mitug-an nga dunay problema sa trabaho si PO2 Bayate sanglit kalit lang kini nga mawagtang sa police station sa panahon nga kini mo duty.

Wa hinuon siya kahibawo nga na adik na diay sa sugal ang iyang sakop sa pagtuo nga mosibat lang ni sa panahon sa iyang trabaho.

“Apektado iyang trabaho kay permi man sya absent sa iyang duty dili lang sa time nako kay sa previous nga mga commanders problema napud na siya,” matod ni Tan.

Niadtong miaging adlaw si PNP Chief Ronald “Bato” Dela Rosa hugot nga nipahimangno sa tanang pulis nga di mosulod sa mga casino nunot sa kamandoan ni Duterte sa tanang mga empleyado sa gobierno.

Tanang mga balay pasugalan gipamutangan og pahibawo sa pagdili sa mga kawani sa gobierno sa pagsulod. /