■GI-AMBUSH:
Nabuak ang pultahan sa usa ka car display center sa Gov. M. Cuenco Avenue sa Brgy. Kasambagan, dakbayan sa Sugbo human maigo sa Tamaraw FX nga gimaneho ni Luther Labares, kinsa gi-ambush kagahapon sa hapon. Natumban ni Lavares ang gasolinador human siya maigo sa pagpusil.
Lawn mower operator sa Cebu Country Club ang gipusil-patay sud sa iyang sakyanan pasado alas 2:00 kagahapon sa hapon sa MJ Cuenco Avenue sa Barangay Kasambagan, siyudad sa Sugbo sa dihang padung na unta nga mopauli sa ilang panimay.
Ang biktima giila nga si Luther Labares, 42, taga Veco Road, Barangay Kasambagan.
Matod ni SPO1 Winston Ybañez imbestigador sa Homicide section nga sigon sa mga nakasaksi nga duha ka mga lalake ang nag atang nang daan daplin sa dalan ug sa dihang naabot ang gisakyanan sa biktima nga Tamaraw FX nga dunay plate number GEH 168 gikalitan lang og pusil.
Human sa nahitabong pagpamusil natumban niini ang kasolinador nga hinungdan nga mibangga kini sa usa ka car
display center nga naa sa dapit nga miresulta sa pagka boak sa bungbong nga ginama sa bildo.
Ang duha ka suspek yano lang nga milakaw paingon sa Veco road nga gituohan nga kaila ra usab sa biktima.
“Posibli nga giatngan ni siya kay matod sa saksi nga atong gi estorya nga kalit lang ni nga gipusil, sa atung duha personal grudge ni siya pero ato sa ni palawman ang imbestigasyon,” matod ni SPO1 Winston Ybañez.
Naigo sa ulo ang biktima apan wala pa matino kung unsa nga kalibre sa armas ang gigamit sa mga suspek sa pagpamusil atol ning pagsuwat.
Sa impormasyon nga nakuha sa Homicide section nga magpautang ug kwarta ang asawa niini sa sulod sa Country cCub nga mao usab ang ilang subayon.
Samtang alas 3:50 gahapon sa kaadlawon usa ka trisikad driver ang gipusil-patay samtang nag inom kauban sa iyang mga higala sa usa ka resto bar sa South Road barangay Poblacion Pardo, syudad sa Sugbo.
Ang biktima giila nga si Mario Cardinas Jr. 31, taga Sunrise Village ekina South Road Barangay sa Poblacion Pardo.
Ang suspek gitumbok nga si Jerry Vargas, 35, taga sitio Ciwak barangay Bulacao sa syudad sa Sugbo ug laing duha nga silang alyas Inting ug alyas Niño.
Sa gihimong imbestigasyon sa Homicide section nga samtang nag inom ug nagkantakanta sa videoke ang biktima.
Giagni kini sa suspek nga mosagol sa ilang grupo nga gisanong usab dayon sa biktima.
Apan pipila ka gutlo ang milabay migawas si alyas Inting ug mibalik usab dayon nga nag bitbit na ug armas ug sa walay daghang pangutana gipusil ang biktima tumong sa ulo nga miresulta sa iyang kamatayon.
Sa gihimong follow up operation nasikop si Jerry Vargas didto sa ilang panimay. /