Pagbantay sa traffic sa Naga karon, ugma

Mipasidaan ang Traffic Management sa kagamhanan sa siyudad sa Naga sa masinati nga hinay nga pag-irog sa mga sakyanan sa kadalanan sa dakbayan gumikan sa duha ka dagkong mga kalihokan nga himuon karong adlawa ug ugma, ang prosesyon ug Sinulog Parade.

Si City of Naga Administrator Engr. Arthur Villamor nibutyag duha lang ka lanes sa tuo nga bahin kon magpaingon sa habagatang Sugbo ang

maagian sa mga sakyanan nga mopadung sa siyudad sa Sugbo ug southern Cebu.

Samtang ang nahabiling duha ka lanes ang gamiton sa prosesyon ug street dancing sa mga contingent.

Alas 5 karong hapon, himuon ang prosesyon nga manukad sa St. Francis of Assisi Parish, dayon mosud sa Barangay North Poblacion, moagi sa atubangan sa Naga Central School, dayon padung sa dan Rizal dayon padung sa nasudnong highway ug pabalik sa simbahan.

Samtang sa alas 2 sa hapon ugma ipahigayon ang Sinulog parade sa kagamhanan sa siyudad nga salmotan sa di mominos sa 17 ka mga contingent sa lainlaing mga kapilya sa Naga.

Ang rota sa parada manukad sa oval dayon mogawas subay sa dan Agoncillo dayon mopadung sa Barangay North Poblacion, gawas sa national highway dayon mosud og balik sa oval sa Barangay West Poblacion.

Si Villamor niangkon nga matrapik gamay ang mga sakyanan nga moagi sa ilang dakbayan apan dili kini grabe ug dili maabtan og duha ka oras.

Suma pa niini ang kahuot sa dagan sa trapiko susama sa nasinati dihang gipahigayon ang Dagitab Festival niadtong Disyembre sa miaging tuig nga gisalmotan sa walo ka contingents diin nadumala ra usab ang dagan sa trapiko.

Siya nipasalig nga paningkamotan sa mga traffic enforcer uban sa kapulisan ang pagpatunhay sa kahusay sa dagan sa trapiko sa duha ka mga kalihokan.