Nganong imahen gisuroy
Gisuroy ang pilgrim image sa balaang bata Señor Santo Niño sa lainlaing mga dapit sa Kabisay-an ug Mindanao.
Si Padre Pacifico Nohara Jr., rector sa Basilica Minore del Santo Niño, nitug-an nga human sa Thanksgiving mass sa kapistahan sa milagrusong bata, gidala ang imahen sa Señor Santo Niño sa Dinagyang Festival sa Iloilo.
Samtang niadtong Huwebes sa Upper Laguna, Greenhills sa lungsod sa San Fernando, habagatang Sugbo ug pagka gabii nilarga na usab sila paingon sa siyudad sa Ozamis nga magsaulog sa kapistahan sa Dominggo.
Gibuhat nila kini kay matod ni Nohara kay gusto nila magmalipayon usab ang mga deboto sa laing mga lugar, gawas sa Sugbo nga masinati ang presensiya sa Ginuo.
Paagi kini sa ilang evangelization nga maoy mando ni Hesus ngadto sa iyang mga disipulo ug sa mga deboto usab sa Señor Santo Niño.
Si Nohara ang niselebrar sa Hubo Mass kagahapon sa pilgrim center nga pormal nga nagtak-op sa kapistahan sa balaang bata.
Sa iyang wali, siya nipasabot ang paghubo ug pag-ilis sa besti sa imahen sa Señor Santo Niño dili lang seremonyas kondili naghatag og pamalandong sa mga tawo nga sama kang San Pablo, tangtangan usab sa mga deboto ang kaugalingon sa sapot sa mga kasal-anan sama sa garbo, kasilag, self-centeredness, corruption ug uban pa.
“Kay sa atong pagtangtang niining mga matang sa sala, we become truly renewed disciples of Señor Santo Niño of our God,” dugang ni Nohara.
Suma pa niini ang Hubo nagdala sa mensahe sa kabagohan, kausaban ug spiritual transformation.
Sa seremonyas sa paghubo ug pag-ilis og sinina, gisugdan pinaagi sa pagkuha sa korona, dayon ang orb ug scepter ug gisunod ang armlet, bands, kapa, tunic, inner garments ug botas uban sa pag-awit.