BMO sa Mambaling naluwas sa pirma sa pari

Nakalinggawas sa posibleng silot nga ipahamtang ni Cebu City Mayor Tomas Osmeña ang mga sakop sa Barangay Mayor’s Office (BMO) sa Mambaling gumikan sa pirma sa pari.

Si Osmeña nagkanayon nga walay dautan ug pribado nga intensyon ang BMO sa ilang pag-solicit para sa ilang delegasyon sa miaging Sinulog.

“The tenor of the letter does not show any malice, primarily because they have the signature of the parish priest,” padayag ni Osmeña.

Kini human iyang nakita ang pirma ni Father Mhar Balili, parish priest sa Archdiocesan Shrine of San Roque kansang simbahan nahimutang sa Mambaling.

Kini gipirmahan sa ilang choreographer nga si Richard dela Torre ug laing upat ka mga sakop sa BMO nga silang silang Konsehal Emier Hamis ug Arturo Belciña ug Gina Lucido nga adunay note ni Balili.

Matod ni Osmeña nga iyang gi-reprimand ang BMO Mambaling gumikan sa ilang gibuhat ug iyang gipasidan-an ang tanang BMO sa nagkalainlaing barangay nga dili mag-solicit sa bisan unsa nga matang sa ilang programa ug proyekto.

Gipahibawo sa mayor nga dili angay modala sa barangay o siyudad ang mga BMO sanglit dili sila awtorisado.

Sa sunod tuig, posibleng pasakaan ni Osmeña ang tabang gikan sa siyudad ngadto sa mga barangay nga mosalmot sa Sinulog 2019.

Ang BMO head sa barangay Apas gihulipan ni Osmeña gumikan sa ilang solicitation ngadto sa mga balay-patigayon sa barangay diin ilang gidala ang logo sa City Hall ug giingong nihulga nga dili i-renew ang business permit kon dili mohatag og P100,000 ug P1 milyon ang kinadak-an.

Samtang, gisugdan na og imbestigar ang BMO sa barangay Mambaling kon si kinsa ang responsabli sa pag-abot sa peryahan sa ilang barangay. Kini human nireklamo si kanhi kapitan Rudy Stella ug supak usab ang onseho.

Ang nakapasuko ni Osmeña mao ang report nga didto pa nikutay sa ilang kuryente ang peryahan sa command center sa City Hall.