Antos sa bakos
Bisag kapila balik-balika pagpahimangno sa mga awtoridad nga ginadili ang pagpang-latos sa mga bata, daghan pa gihapong mga ginikanan ang padayong namunal.
Gani, ang American Journal of Family Psychology mi-ingon nga sa lima ka tuig nilang pagtuon ngadto sa 160,000 ka mga batang gipanglatos, nakita nga ang pagpamunal isip paagi sa pagsilot o pag-desiplina way nahatag nga kaayuhan sa mga bata kay nakapasamot hinuon kini sa ilang pagpanukol nga madala hangtod sa ilang katiguwangon.
Ang uban miresulta sa pagka manggi-uwawon ug magulanon. Ang uban sab ma agresibo ug kusog manghagit og away, luya ug hinay ang pangutok, ug daling ma depressed.
Ang pagbunal dili solusyon o paagi sa pagdisiplina.
Diay mga suhistiyon nga mahimong suwayan panahon nga mo siaw og sipat, mag-minaldito o magpabuyag ang bata:
Una, e-deadma. Kung saputon ang bata unya mo ligid, mamatid, mohilak dalang syagit nga murag baboy giluba, ayaw kini pansina labi na kung maayo ra ang lawas unya wa gigutom o nagsakit. Pasagdi kini hangtod kapuyon ug mo undang. Human pasabta nga dili tanan niyang gusto matuman.
Ikaduha, hinumdumi nga ikaw, isip ginikanan, maoy unang modelo sa bata. Kung unsa iyang makita ninyo, mao sab kini iyang pagasundon. Busa, himoa imong kaugalingon nga sulundong ehemplo.
Ikatulo, sutaa ang tinubdan o rason nganong naingon. Kastiguha ang nakasala human pasabta sa iyang kalapasan para maka-amgo sa iyang hiwi nga binuhatan. Ipakita sa ubang anak nga wa kay favoritism ug patas imong dinad-an.
Ika-upat, ayaw pagpalingpaling sa imong aksyon ug desisyon. Pakit-a ang mga bata nga seryuso ka sa imong punto ug tumong.
Sunod, hatagi og laing alternatibong kalingawan nga makapahait sa ilang ubang kahanas sama sa sports, arts and crafts, duwa og instrumento o pagsuwat .
Katapusan, pag-schedule og ‘Chill Day' nga maka gawas mo tanan sama sa picnic, tan-aw og sine, duwa sa playground, suroy sa mall o mag ice-cream.
Hinumdumi nga ang pagpasensiya maoy yawe sa pag-disiplina.