Barangays luwas sa drugas?

Misalta ang kadaghanan kay dili makatuo nga dunay barangay nga drug free. Dihay 13 ka barangays sa siyudad sa Sugbo nga gideklarar nga drug free apan napakgang sa pamahayag sa COSAP nga walay barangay nga luwas sa drugas.

Unang gikataho sa lalawigan sa Sugbo nga 16 ka barangays sa Alcoy, Boljoon ug Santander gideklarar sa CPPO nga drug free.

Gisundan sa taho nga 65 ka barangays nga wala nay drugas sa Dumanjug, Tabuelan, San Francisco, Poro, Tudela ug Pilar sumala sa evaluation sa CPPO, PDEA 7 ug CPADAO.

Deklarasyon sa PDEA 7 nga drug free ang 120 ka barangays sa Sibonga, Argao, Dalaguete, Alcoy, Boljoon, Santander, Samboan, Balamban, Tabogon, San Remegio, Borbon, Catmon, Tabuelan, San Francisco, Poro, Tudela, Dumanjug, Ronda, Alcantara, Moalboal ug Ginatilan; 40 ka barangays ang drug cleared sa Oslob, San Remegio, Tabuelan, Tabogon ug Bogo.

Ning ulahi 29 ka barangays sa Bogo ug 11 sa San Remegio sumala sa oversight committee.

Apan giisip nga self-serving kay ang deklarasyon gibasi raman sa sertipikasyon sa BADAC sa barangay ug MADAC sa munisipyo.

Morag pari nga midayeg sa kaugalingong kombento. Dihay higayon nga nakugang ang CPADAO sa probinsya nga wala pa gani usa ka bulan gikan sa deklarasyon mga 30 porsento sa tanang mga drug surrenderee positibo sa pag- gamit og drugas.

Nunot niini 160 ka drug cleared barangays gibawin sa ilang certificate sa CPADAO. Katuohan ba kaha ang deklarasyon sa drug free barangays nga naa man sa bagang talaan ni Pres. Rodrigo Duterte ang mga narco-politicians hinungdan man gani sa sugyot nga iuswag kadtong piniliay sa barangay ug SK sa miaging tuig nga posibling gastohan sa kwarta gikan sa drugas.

Hinoon sa Mayo 14, 2018 segurado na nga mahinayon. Apan sa 2019 mid-term election duha ang gipalutaw nga pangagpas. Walay eleksyon (No-el) kon maumol ug ma-ratify ang bagong konstitusyon ubos sa ideya paglugway sa termino sa piniling mga opisyal agig pagpangandam sa federal govt. Gani mga lider sa kongreso nagkasabot nga umolon ang Constituent Assembly (Con-ass) aron amendahon ang 1987 Constitution nga abagan sa 25 ka mga sakop sa Copnstitutional Commission nga tinudlo sa presidente.

Apan si Duterte sa iyang bahin gustong mahinayon ang eleksyon sa 2019 diin komitido sa paghatag og tarong, limpyo, katuohan nga resulta o credible and honest election. Goodbye sa mga tikasan sa PICOS.

Ubos sa PDP-Laban Constitution, ang Office of the Vice President abolison kon molampos ang bag-ong konstitusyon nga i-ratify atol sa 2019 nga eleksyon. Vice Pres. Leni Robredo palagpoton og sayo sa dili pa matapos ang iyang termino sa 2022 sumala pa ni Bayan Muna Rep. Neri Colminres.