Makigbalik

Dear Noy Kulas,

Maayong adlaw nimo diha ug sa imong mga kauban sa Superbalita. Ako diay si Fred. Minyo na ko ug dagko na ang akong mga anak.

Nagpadala ko nimo aning akong suwat human ko nakabasa sa letter sender ni Papa Joe kay bisan anak to, pero medyo pareho ang among problema. Nagbuwag mi sa akong asawa mga 20 ka tuig na kapin kay nagkabalik sila sa iyang childhood sweetheart human sa pipila ka tuig namo nga panag-uban. Nakaanak na gani sila while ako, wa na mangita og lain kay akong gigahin ang akong panahon sa among mga anak nga nawad-an og mama. Naa man gud nako ang among tanang mga anak mao nga wa na lang nako labda ang akong ulo sa nahitabo namo. Pero naa koy mga babaye, kutob ra sa iring-iring kay di na ko ganahan og commitment.

Milampos ko kay tanan nakong mga anak nakahuman na ug ako hapit na mo-retire sa trabaho nga nagbuhi namo. Karon, ang akong asawa gustong makigbalik nako kay ang iyang kapuyo (wa namo gipa-annul ang among kasal) namatay sa sakit. Bisan sa iyang gibuhat, wa ko magdumot niya kay nahigugma gihapon ko niya bisan hangtod karon. Mao to nalipay ko pagsulti niya, pero ang among mga anak di mosugot.

Mao ni ang akong problema karon, Noy Kulas, kon unsay akong buhaton. Kinsa ang akong sundon, ang akong kasingkasing o ang akong mga anak? Tambagi ko, Noy Kulas.

FRED

Fred,

Wa may makabuot nimo kon imong dawaton ang imong asawa pagbalik bisan pa sa iyang gibuhat nimo. Kon imo siyang dawaton bisan pa sa pagsupak sa imong mga anak, mahimo kaayo nimo kon imong gikonsiderar ang imong kalipay.

Sa di ka pa mohimo sa mao nga desisyon, tapoka ang inyong mga anak ug pasabta sila sa unsay naa sulod sa imong kaugalingon. Kon nakapasaylo ka, hangyoa sila nga mopasaylo sa ilang inahan. Kon nakapasaylo ang Ginuo nga maoy nagbuhat nato, nganong di man sila makapasaylo, bisan tungod ug alang na lang unta kanimo. Kay kana mao may imong kalipay.

Pag-ampo sa Ginuo nga lamdagan ang imong anak kay bisan unsaon, inahan kini nila.

NOY KULAS