I can’t push my dream anymore

OLIVER P. FLORES (Katapusan sa pito ka mga gula)

Nawad-an gyud kog gana sa pagpadayon sa paglingawlingaw niadtong adlawa. Nakigpamauli na ko kang Pamela. Nakasabot man sab nako ang akong amiga, misugot siya.

“Ang importante nga nakapanagkot ta sa simbahan ni Santo Nino. Nakapamista Senyor ta bisag kadiyot lang.”

Gingisloan ko na lang si Pamela. Mikidhat siya nako.

Nagbuntag kong wa makatulog nianang pagka gabii. Igo na lang ko nagpatulo sa akong mga luha. Ning akong paghilak ron, nasuta ko na gyud nga nahigugma ko kang Dave. Gisakitan kaayo ko, uy, pagkahibawo nako nga duna na diay siyay girlfriend. Apan kinahanglang dawaton ko kini. Ug nahunahuna ko nga ang nahitabo nako ron usa lang tingali ka pagsukod sa Dios sa kalig-on sa akong pangandoy nga mahimong madre.

Pagka ugma giduol ko ni Dave samtang nag-esnak ko sa school canteen. Milingkod siya sa akong atbang. Softdrinks lang ang iyang gi-order sa counter. Wa ko magpasabot nga naglagot ko niya.

“Nakita tika gahapon nga nagtan-aw sa Sinulog sa Sports Center. May kauban kang girl. Uyab to nimo, no?”

Mitando si Dave. Unya seryuso kaayo siya. Gitan-aw ko niyag dugay.

“Tomboy ko, Kris. Parehas tang babaye.”

Wa gyud ko makatingog dayon. Very shocking ang confession ni Dave. Unya mikatawa ko. Apan sa ilawom sa akong dughan, napun-an ang gibati kong kasakit.

“Nganong gisulti man kini nimo nako, Dave?”

“Di ko gusto nga mahimo kong karibal ang Diyos nimo. Na-in-love ko nimo. Di ka lisod mahalon. But di ko gusto nga ako ang mahimong rason sa di mo na pagpadayon sa pagmadre. Di ta para sa usag usa, Kris. Padayon kon unsa man ang imong gipangandoy.”

Nahilom ko. igo ko na lang gisundan sa pagtan-aw si Dave nga mibiya nako. Nakapanghupaw ko. ug hilom kong nakahilak.

Milabay ang mga adlaw. Wa ko na makita si Dave sa eskuwelahan. Ug nahibaw-an ko na lang nga mibalhin siyag eskuwela sa laing university. Nakasabot ko. Maoy gusto ni Dave nga di na mi magkita. Parehas ming duha, nahigugma sa usag usa apan parehas ming babaye.

Laing mga adlaw ang milabay. Nakaingon ko nga di na ko magmadre dihang gikaila ko si Dave. Apan karon, nia na ako duol sa Diyos. Nia na ko sa monasteryo nagpuyo.

(KATAPUSAN)