■PANG-KNOCKOUT:

Mihimo dayon og langas si Filipino Jerwin “Pretty Boy” Ancajas sa labing una niyang away sa Amerika pinaagi sa pagposte og impresibong 10th round knockout nga kadaugan batok kang Mexican Israel Gonzalez aron depensaan ang iyang International Boxing Federation (IBF) super flyweight title kagahapon sa American Bank Center Corpus Christi, Texas.

Si Ancajas, kinsa gikonsiderar nga sumosunod sa lakang ni boxing icon Manny Pacquiao, katulo mitumba kang Gonzalez una giundang sa referee ang away sa ika-1:50 minutos sa 10th round.

Unang gitumba ni Ancajas si Gonzalez sa 1st round pinaagi sa iyang gikahadlukang wa nga kumo nga miigo sa nawong sa Mexican.

Sa pagpadayon sa away, si Gonzalez tataw nga nagmatngon na sa iyang mga lihok samtang si Ancajas wala sab magdalidali ug padayon kining nangita og saktong kahigayunan aron makaposte og impresibong kadaugan.

Adunay rounds nga medyo laay tan-awon ang away gumikan kay parehong nagmatngon ang duha ka mga boksidor ug igo lang kining nagpasudlanay og mga kumo diin midominar si Ancajas.

Nasayod nga nabiyaan na siya sa scorecards, miagresibo si Gonzalez sa ulahing bahin sa away ug mao na kini ang kahigayunan nga gihuwat ni Ancajas.

Laing makusog nga wa nga kumo ni Ancajas ang nagpatumba og balik ni Gonzalez sa 10th round.

Nakabarog pa man tuod si Gonzalez apan natumba ra dayon kini pagbalik human maigo sa laing wa nga kumo ni Ancajas ug ning higayuna, giundang na sa referee ang away.

Sa interbyu sa ABS-CBN, matod ni Ancajas nga gituman niya ang tambag ni Pacquiao nga ipagawas ang tanan niyang ikabuga.

Si Ancajas, kinsa nakahuman sa premirong tahas sa iyang unom ka mga away nga kontrata sa Top Rank boss Bob Arum, sakop sa MP Promotions nga gipanag-iya ni Pacquiao.

“He’s a very exciting fighter and he’s going to be a fan favorite, not only in the (United States) but worldwide,” matod ni Arum kabahin kang Ancajas sa interbyu sa www.caller.com.

“It was an excellent performance.”

Si Gonzalez nagkanayon nga wa siya magdahom nga ma-knockout ning awaya.

Hinuon gipasalig ni Gonzalez nga makabangon ra siya gikan ning maong kapakyasan.

Ang 26 anyos nga si Ancajas, kinsa nakadepensa sa iyang titulo sulod na sa upat ka mga higayon, misaka sa 29-1-1, 20 KOs nga rekord samtang ang 21-anyos nga si Gonzalez midakin-as sa 21-2, 8 KOs nga baraha.

/ INTERNET Si Jerwin Ancajas (tuo) nihunat sa kumo nga pang-knockout sa 10th round batok kang Israel Gonzalez ug nagpabiling junior bantamweight title holder human sa away sa American Bank Center sa Corpus Christi, Texas kagahapon (oras sa Pilipinas). KIni nga...

/ HULAGWAY GIKAN SA ABS CBN NEWS ■ GITUMBA. Maayong pagkatumba ang Mexicanong challenger nga si Israel Gonzales (wala) sa dihang naantimano og igo sa usa ka solidong left straight ni International Boxing Federation (IBF) super bantamweight champion Jerwin Ancajas niining aktoha atol...