Guardian app. gipalambo sa daling pagtubag sa emerhensiya

Tinguha sa software firm nga SugboTek Inc., nga sa Abril ning tuiga hingpit na nga

operational ang emergency mobile application sa upat ka mga barangay sa dakbayan sa Sugbo nga maoy napilian nga pilot areas nga mag-una sa paggamit sa bag-ong aplikasyon nga gitawag og Guardian.

Ang Guardian kun Geographic Unified Assistance and Response to Distress Incidents with Agile Networking, gi-develop sa SugboTek Inc. aron mas paspas ang pagsangpit og tabang ug pagresponde sa emerhensiya o kalamidad.

Ang upat ka mga barangay mao ang Poblacion Pardo ug Tisa sa habagatang distrito ug Sto. Niño ug Apas sa amihanang distrito diin ang SugboTek nidonar og computer ug kahimanan aron maka-connect sa internet.

Si Cloyd Dedictoria, presidente ug chief executive officer sa SugboTek, niingon nga target nila moabot sa 200,000 ka aktibo nga volunteers nga mopahibawo o mohatag og kasayuran kon dunay panghitabo sa palibot.

Ang angay buhaton sa gustong mag-volunteer mao ang pag-download sa Guardian app sa Google Play ug i-install sa ilang mobile phones.

Bisan kon way load sa mobile data, basta adunay

intranet wifi connection, mamahimo nang ma-access o magamit ang Guardian app aron manawag o magpakitabang sama kon dunay krimen, sunog, disgrasya o medikal nga emerhensiya.

Matod ni Dedictoria sukad gisugdan ang pag-install sa mga engineer sa gikinahanglan nga kahimanan o ekipo niadtong Enero 19, duna nay 200 kapin ka volunteers ang ni-download sa app ug nakadawat na sila og report nga 25 ka mga insidente.

Usa na niini ang sunog nga niulbo sa Sitio Baca, Barangay Apas diin nag-abot abot ang nirespondi nga mga bombero.

“So, amoa dapat ma-coordinate ang response sa atong mga barangay,” sumala ni Dedictoria atol sa presentasyon sa kalamboan sa aplikasyon.

Sa presentasyon, siya nipahibawo nga sa bag-ong version

2 sa app, mahimo nang makapadala og video ang manawag ug nagpakitabang ug makita kini sa operator sa labing duol nga dispatch center.

Ginamit ang global positioning system kun GPS, mahibal-an sa Guardian operator asa nahimutang ang nanawag gamit ang Google Map ug makita pa gani ang palibot niini gamit ang street view sa Google Earth.

Si Poblacion Pardo Barangay Kapitan Altea RacuyaLim niingon nga dako og tabang ang Guardian app sa pagtubag og emerhensiya o mga panghitabo labi na gipaayo pa nila ang ambulansiya sa barangay sa General Services Office sa Cebu City Hall.

Ang ilang sinaligan nga mga tawo nabansaybansay na niadtong Nobiyembre sa miaging tuig.