2 KA ROTA GI-SURVEY SA LTFRB 7
Duha ka 'missionary' nga mga rota sa dakbayan sa Sugbo gi-survey ang gidaghanon sa mga pasahero sa Land Transportation Franchising and Regulatory Board sa Central Visayas sa posibilidad nga dinhi pasubayon ang bag-o ug moderno nga mga jeep pasaheroan subay sa Public
Utility Vehicle Modernization Program. Si Ahmed Cuizon, regional
director sa LTFRB 7, nibutyag pinaagi sa passenger survey ug
technical nga pagtuon mahibaw-an kon makaginansiya ba ang mga operator sa moderno nga mga PUJ ug kon pila ang distansiya, ang porsyento sa lokal ug nasudnong dalan nga magamit sa rota ug uban pa.
Ang unang rota manukad sa Cebu City Hall paingon sa Robinson’s Galleria dayon sa Cebu Business Park (Ayala) lahos sa Cebu Asiatown I.T. Park.
Samtang ang ikaduhang rota magagikan sa Convergy’s sa Banawa paingon sa Fuente Osmeña dayon sa Osmeña Boulevard agi sa Cebu Normal University dayon sa RR Landon lahos sa dan sa D. Jakosalem lahos sa Iglesia Ni Cristo sa Gorordo Avenue dayon sa Cebu Business Park hangtod sa Syke’s sa Mabolo.
Si Cuizon namahayag ang duha ka missionary o developmental nga mga rota maoy gihangyo sa kagamhanan sa siyudad sa Sugbo aron maserbisyohan ang mga trabahante sa industriya sa Business Process Outsourcing (BPO) nga dako og natampo sa paglambo sa ekonomiya sa Sugbo, diin panahon sa kagabhion maglisod og sakay og PUJ.
Ang survey sa unang rota, matod sa director, nahuman na sa miaging buwan ug gihipos na ang mga data samtang sugdan sa dili madugay ang ikaduhang rota.
Tinguha nila mahuman ang tanan sa unang quarter ning tuiga.
Ang director nipasabot limitado lang sa 20 ka PUJ units ang tugtan nga makabiyahe sa duha ka missionary o developmental nga mga rota sud sa duha ka tuig.
“Within 2 years, walay lain maka-apply ana nga rota aron makaginansya gyud pod ang
operator nga way kompetensya,” pahayag ni Cuizon sa Superbalita Cebu.
Gawas nga maserbisyohan ang mga call center agent sa unang rota, sayon usab ang pagsakay sa mga tawo mohimo og transaksyon sa Cebu City Hall, mga turista nga mosuroy sa Magellan’s Cross ug Fort San Pedro ingon man ang mga manimbahay sa Basilica Minore del Santo Niño ug Cebu Metropolitan Cathedral nga maagian.
Matod ni Cuizon ang ikaduhang rota gipili aron mas sayon usab ang pagsakay sa mga molupyo nga moadto o gikan og mga ospital ug Department of Health kay malabyan kini sa maong rota.
Siya nidugang dili usab kini direkta nga makigkompetensiya sa mga drayber nga naandan nang nagbiyahian sa maong mga rota.
“In places where they will share road space with existing PUJs, the modern jeeps will not have loading/unloading areas. That way, they will not create a conflict,” dugang ni Cuizon.