Citrasco aircon jeepneys nalangay: Yu
Naungot sa gikinahanglan nga mga dokumento ang Cebu Integrated Transport Service Multi-purpose Cooperative (Citrasco) hinungdan nga wala pa makasugod og pamasahero ang 20 ka bag-o ug air-conditioned nga passenger jeepney units niini sa Sugbo. Si Ryan Benjamin Yu, general manager ug chairman sa Citrasco, niangkon nga wala pa nila maduso ang tanang rekisitos nga gipangayo sa Development Bank of the Philippines (DBP) sa pagpangutang og dakong kantidad alang sa pagpalit sa 20 ka bag-o ug moderno nga PUJ units.
Apil sa gikinahanglang mga dokumento ang feasibility
study sa viability sa rota nga subayon sa maong PUJ units, certification sa lainlaing mga
operators, biodata sa mga drayber ug ubang mahinungdanon nga mga papeles.
Ang matag unit nagkantidad gikan sa P1.6 milyones ngadto sa P2.7 milyones.
Matod ni Yu hapit na duha ka buwan ang pagkalangay sa biyahe sa 20 ka air-conditioned PUJ units.
Unang target nila nga makasugod kini og pamasahero niadtong Disyembre 19 sa miaging tuig, apan nairog na usab ngadto sa Enero, sa dili pa ang Sinulog. “I’m hoping this month, kay
dako kaayo ta og alkansi,” dugang ni Yu sa pakighinabi sa Superbalita Cebu.
Ang 20 ka air-conditioned
PUJ units mosubay sa rota gikan sa Cebu City Hall paingon sa Asiatown I.T. Park nga moagi sa Robinsons Galleria Cebu dayon sa Cebu Business Park ug vice versa.
Sud sa 24 oras ang mga biyahe niini.
Si Yu namahayag gitan-aw nila ang rota nga dunay mga Business Process Outsourcing (BPOs) kay kini ang gisugyot ni Cebu City Mayor Tomas Osmeña ug ilang nabantayan nga inig ka gabii magproblema na og sakay ang mga nagtrabaho sa mga call center kay nihit na ang mga PUJ nga mamiyahe.
Siya nidugang tungod niini ang mga call center agent manakay na lang og mga habalhabal nga mahal ang plite ug risgo usab. “Taas ang risk sa motorcycle nga duha ra ang ligid compared sa PUJ nga upat ang ligid,” dugang ni Yu.
Ang 20 ka modernong jeepney units kay naa na sa kilid ang pultahan nga luwas ang pagsakay ug pagkanaug sa mga pasahero, dili lisod ang pagsaka sa hagdanan, dili na magduko ang pasahero inig sud kay 6 ka tiil ang gitas-on gikan sa atop paingon sa sawog, sama na og porma sa mga lingkuranan sa bus ang mga lingkuran nga mag-atubang sa drayber ug 30 ka mga pasahero ang masulod. Aduna usab kini libre nga wi-fi, may speed limiter, dash
cam, Global Positioning System (GPS), closed-circuit television camera ug automated fare collection system.