Anak sa kapitan sa Brgy. Manipis nakaipsot sa buy-bust

Anak sa barangay kapitan sa Manipis, dakbayan sa Talisay nakaipsot sa buybust operation sa kapulisan, apan duha ka mga kauban niini mao ang nasikop.

Samtang si Kapitan Emma Cabiluna miangkon nga mogamit ang iyang anak sukad pa kaniadto, apan niingon nga dili kini pusher.

Niadtong Sabado pasado alas 3:00 sa hapon, nihimog buybust operation ang mga sakop sa Drug Enforcement Unit pinangulohan ni Insp. Inar Vic Florece, ang deputy chief sa Talisay Police Station.

Ang target sa operation mao si Juniel Neosenia Cabiluna, 32, ulitawo, apan adunay kapuyo, taga Barangay Manipis ug anak ni Kapitan Emma Cabiluna sa Manipis.

Nasayran ang kapulisan kanunay makadungong sa pangalan ni Juniel nga maoy mamaligyaay sa lugar hinungdan nga nihimo sila pag-monitor.

Sa dihang nagpositibo, nihimo silag buybust operation, apan nakabantay si Cabiluna nga pulis ang iyang gikatransaksiyon dali kini nga nisibat.

Apan ang duha niya ka mga kauban nga sila si Robin Alformon, 25, ulitawo ug mahuyang, ingon man si Jupiter Salva, 35, pulos taga didto sa maong lugar.

Nakuha gikan ni Salva ang armas nga .357 nga adunay bala.

Samtang, nakakuha silag duha ka pakite sa gituohang shabu nga nahabilin ni Cabiluna.

Si Insp. Florece niingon nga dili pa nila matino kon may kalabotan ba ang iyang inahan nga kapitan sa barangay sanglit padayon pa ang ilang imbestigasyon ug pagpangita sa gikatahapang anak sa lider sa barangay. /