2 ka suspek nangayo og pasaylo ngadto sa pamilya ni Mark Oberes
Nangayo'g pasaylo sa pamilyang Oberes ang manag-uyab nga Engr. Josua Garciano ug Ressa May Cabañog, mga suspek sa pagpatay ni PAF Staff Sergeant Mark Oberes.
Samtang, naghilak nga mihangyo si Ressa May sa iyang inahan nga si Edna Cabañog, ang giingon mastermind sa krimen, nga motahan sa awtoridad.
Si Oberes gipatay human gisunog sulod sa iyang sakyanan sa siyudad sa Carcar.
Ang nasikop karon sa kapulisan nga si Garciano ug anak ni Edna nga si Ressa May nga pulos nangangkon nga wala silay kasayuran sa dautang plano ni Edna ngadto ni Oberes.
Gumikan niini, nanawagan ang duha nga motahan na kini aron dili sila maoy mag atubang sa kaso.
Kini bisan paman og nipirma nag extra judicial confession si Garciano aron mahimo siyang state witness.
“Te, ari na unta kay na pa koy mga manghod. Ang akong mama napay sakit unya ingon ani lang," matod ni Garciano nga naghilak.
“Hangyo ko nga ari na diri limpyohi unta akong pangan maluoy unta ka, te. Napa ko manghod gipaeskuyla nako,” dugang ni Garciano nga nahinabi sa Superbalita Cebu.
Ang anak ni Edna nga si Ressa May nanawagan usab ngadto sa iyang inahan nga motahan na ngadto sa kapulisan aron makalingkawas na sila sa pasangil.
“Moari lang unta siya diri para ma okay na ang tanan if wala siya diri kami man ang ipiton, kami mapasanginlan nga kami nakapatay,” matod ni Resamie nga naghilak usab.
Samtang nangayo usab si Ressa May og pasaylo ngadto sa pamilya ni Oberes.
“Mangayo lang gyud mi sorry. Kami wala kahibawo nga ingon ato mahitabo. Nisugot makigkita para ma okay na tanan, hilom na tanan,“dugang ni Ressa May.
Sa pagkakaron, padayon pang gipangita ang inahan ni Ressa May ug gipasaka na ang kasong murder niadtong Biyernes./