Problema, solusyon
Dili na madala og katawa o pasiaw kon maghisgot kita og mga problema sa kadalanan sa Metro Cebu. Timailhan nga seryuso ang giatubang sa katawhan matag adlaw sa paglatas sa kalbaryo nga agianan padulong sa trabahoan, eskuwelahan o bisan sa pagpanuroy ug pauli sa tagsatagsa ka balay o gisak-an sa dakbayan.
Ang problema sa dalan komplikado kaayo, gikan sa yano nga lubaklubak o gubaong dalan, walay karong drainage system busa murag sapa matag bunok sa uwan, grabe katrapik, mga abusadong motorista nga hinungdan usahay sa mga nahitabo krimen sa dalan ug uban pa nga naghatag og risgo sa kinabuhi sa atong inadlaw-adlaw nga panginabuhi.
Labaw na ang problema sa dalan nakamugna og negatibong epekto sa ekonomiya. Ang mga negosyante nag-apas sa daghang opurtunidad apan nakasugat og kalangay sa pagbiyahe sa walay klaro nga kahan-ay sa sistema sa transportasyon.
Tungod sa kaseryuso sa problema, dili na puwede nga mabaliwala sa mga lokal nga opisyal. Dunay mitumaw nga pagpakabana gikan kanila. Ang nakapaet, tungod sa subra pamulitika, managlahing solusyon ug interes pagpatuman sa proyekto nahimo na usab nga babag sa kalamboan. Mao kini hinungdan nga taphaw lang makita sa problema sa kadalanan ug ang pagpatuman sa lagda sa kadalanan o trapiko lurang-lurang. Karon istriko, ugma luag.
Nasayod ka kamo nga ang problema mas lawom kon itande sa inyong nakita? Kinin tanan nagsumikad sa duha ka hinungdan - ang pamatasan (motorista ug alagad sa kagamhanan) ug ang kadalanan nga dili makasagubang sa kadaghan sa sakyanan, nag-abot ang mga bag-o ug karaang sakyanan labi na ang mga ‘segunda mano’ nga gipanglabay gikan sa ubang nasod.
Busa, ang pagsulbad o solusyon dili sayon. Kombinasyon nga motubag sa matag aspeto sa problema apan nakapunting sa pamatasan sa tawo ug tukma nga inprastraktura.