Binisaya sa Gabinete

Dihay panahon nga ang pinulongang Bisaya gibiaybiay didto sa kaulohan nga pinulongan lang sa mga maid kon mga katabang sa panimalay kay lagi daghan mang mga Bisaya nga nanimpad didto isip mga katabang sa panimalay.

Pero di na sila karon makabiay-biay sa pinulongan nga atong namat-an og kahayag kay si Presidente Rodrigo Duterte nimando niadtong Huwebes nga ang Cebuano o ang pinulongang Bisaya mao nay gamiton sa mga meeting sa iyang Gabinete.

Kadtong sakop sa Gabinete nga di makamaong mosulti og Bisaya kinahanglang magtuon na, matod pas presidente. Nindot kaayo kon ing-ini (minugbo sa ingon ani) ni. Mas dali nga molambo ang pinulongang Bisaya nga giamit sa mga Bisaya sa Kabisaya-an ug Mindanao.

Ang Sun.Star Superbalita dugay na nga kampeyon sa pinulongang Bisaya. Miingon tang kampeon kay kining maong pamantalaan nanlimbasog man sa pagpalambo sa atong kaugalingon ug matam-is nga pinulongang Bisaya.

Ang pinulongang Tinagalog, nga ingnon nilang Filipino kay gisaglan man og pipila ka mga pulong nga Binisaya, nilambo kay gitudlo man sa mga tinunan sa mga eskuylahan sa elementarya, high school ug kolehiyo sa tibuok kapupud-an.

Kon ang presidente mismo nga usa ka Bisaya maoy momando sa iyang mga sakop sa Gabinete nga mag-Binisaya, tingali molambo sab ang atong pinulongan.

Dunay mga pasiaw nga nagingon nga mas abante ang pinulongang Bisaya kay sa Tinagalog. Sa Tinagalog ang langgam (hulmigas) nagkamang pa, samtang sa Binisaya ang langgam naglupad na.

Sa Tinagalog ang paa (tiil) nagtugkad pa sa yuta, samtang sa Binisaya ang pa-a duol na sa bugan. Sa Tinagalog ang nagwalis nanilhig pa, samtang sa Binisaya, nakita na ang sampot. Sa Tinagalog ang upa nangabang pa, samtang sa Binisaya ang upa nagpatong na.

Bitaw ang importante nga magkasinabot. Sama niadtong Tagalog ug Bisaya nga nagyayong og dakong kahoy. Ingon sa Tagalog, “Ang bigat pare.” Tubag sa Bisaya nga nakasabot sa Tagalog, “Bitaw.” Pero ang Tagalog wa kasabot sa bitaw nga Binisaya, maong iyang gibuhian ang kahoy.