Pwerting hasula
Sa adlaw nga tingklase ug tingtrabaho ang karsada puwerting hasula. Mga pasahero magbaha daplin sa karsada. Maudtohan pagpinaabot ug kasakyan. Ma-late sa trabaho ug sa eskwelahan. Malangay sa sabot ug sa mga adtuonon.
Ang singgit ug pangutana asa na ang sulbad nga kanunay’ng ipasalig sa mga politiko panahon sa kampanya.
Mao nga ang gobyerno naghisgut og mass transport system. Bus ug train ilang gipailaila.
Sa mga interview kanunay kining isalida. Taym pa. Di ba niadtong dekada 90 ang mga pasahero nga gikan sa Colon padung Tabunok nga ruta gisugdan naman ug hakot pinaagi sa mga bus.
Nag-una kadtong mga bus nga iyaha sa Department of Tourism. Unya nisunod ang mga Kaushiong bus sa Cebu City Halk.
Apil ko sa nakasakay sa didto pa ko magpuyo sa Bulacao. Sa ato pa ang problema sa kakuwang sa public utility vehicle dugay na nasinati. Nganong karon pa gipangitaan ug solusyon.
Dul-an sa 30 ka tuig na ning problemaha.
MODERNIZATION Naghisgut sila og kausaban sa panagway ug operasyon sa mga jeep.
Kung kitang mga sumasakay ang pangutan-on daghan kita ug suhesityon. Di ba? Ang maayo nga kuhaan ug basi ang mga pasahero nga senior citizen, mabdos , person with dis- ability kun PWD ug mga bata. Di ba nindot nga kung sila ang mosakay ug jeep usa ka tikang deretso na sa lingkoranan.
Di parehas sa ubang jeep karon nga habug kaayo ug tikanganan. Human og tikang di na ta magduko.
Patas-an ang atop aron magtuyhad ang pasahero padung sa lingkoranan. Unya usbon nato ang paagi sa pagsakay.
Ang na-una adto sa likod sa driver molingkod. Unta ang lingkoranan pabor sa pultahan kanunay nga bakante aron ang mauwahi ug sakay moderetso na lang ug lingkod.
Paita sa sitwasyon ron. Mauwahi ka ug sakay adto pabor sa driver ang bakanting lingkoranan ang imong padulngan kay ang mga pasahero nga naguna magpa pabor sa pultahan.
Looy intawon ang mga senior, mabdos ug PWD. Samot na kung kuwang naka sa panuhod. Unta sa mga nakabasa karon makakat-on ta ug leksiyon nga kanang jeep way kalainan sa atong sala. Ang mga bisita nga mangabot palingkoron nato ug tarong. Labi na sa mga edad edaran ug may kakulian sa panlihok lihok.
Unya batasanon na sab nato nga sa di pa mosakay mag-andam na ta ug sensilyo para plete. Langay ug hasol kaayo para sa driver nga way konduktor.
Di man gud tindahan o supermarket ang atong gisudlan. Malooy sab ta sa mga driver nga nagkapuliki ug panukli unya may manobela, kambiada, clutch, brake ug accelerator nga tumban.