Forgiveness

Nagtiyabaw si Marlene. Nagdali kong mipadayon paglakaw. Migawas ko sa among gate. “Te Lorena!! Pasayloa ko!” Misinggit si Marlene apan wa ko siya tagda. Wa gani ko molingi niya. Naglagot gyud ko niya. Ug samtang nagsakay kog taksi paingon sa ilang balay ni Tiyo Donato ug Tiya Tessie, nagsige kog hilak. Di gyud unta ko gustong mobiya kanila ni Mama ug Papa. Mingawon ko nila kay gimahal ko sila. Ug gipangga sab ko nila.

Apan si Marlene ang hinungdan ning tanan. Traydor siyang pagka igsuon. Ug di kay si Marlene lang ang akong gikasilagan, hangtod na sab si Rowan. Ang tuntong Rowan gilumpong ming magsuon! Kaayo gyud untang ipabarang sa kanahan kon di pa sala sa Diyos! Ngano ba sab nga nagpatental man siya sa akong manghod, uy?

“Paraygon kaayo siya nako, Lorena. Kanang wa ka sa inyo inig pamisita nako nimo, siya ang moatubang nako. Seksi kaayo siya. Magpakigol sa isul-ob nga short pants. Unya, ang iyang blouse mubo sab ug makita ang iyang pusod. Motupad gyud siyag lingkod nako. Modikit gyud siya nako. Pasayloa ko kay tawo lang ko, Lorena.”

Mao ni ang gipasabot ni Rowan nako kon nganong nagkarelasyon sila si Marlene. Apan wa ko siya paminawa. Gitulisok ko siya samtang hapit na lang siya moluhod sa akong atubangan usa ka gabii nga mibisita siya nako. Naghilak si Marlene niadtong tungora sa iyang kuwarto. Nasakpan ko man gud silang duha sa akto nga nag-holding hands samtang nanuroy sa Colon.

Nakatiyabaw gyud ko pagayo niadtong tungora sa ako nang pagpauli. Gipanumbag ko ang unlan sa akong kama tungod sa akong kalagot sa akong igsuon ug ni Rowan. Morag mobuto ang akong dughan sa kasakit ug sa kasilag ko kang Marlene ug kang Rowan.

Kinsa man say malipay? Kaugalingon nakong igsuon miilog sa akong boyfriend?

Love ko si Rowan. Siya ang akong first love. Giisip ko man gani nga siya na ang lalaki sa akong kinabuhi forever. Apan di kini igong rason nga pasayluon ko sila si Marlene sa ilang pagtunto nako. Maybe, hangtod sa akong kamatayon, kasilagan ko sila.

Miginhawa kog lawom ug namahid sa akong mga luha pag-abot ko na sa ilang balay ni Tiyo ug Tiya. (SUMPAYAN)