GOLDEN STATE PILDI SA DENVER

Cavaliers gilubong sa Rockets , Spurs gipasayaw sa Jazz

Nagkumboya sila si Nikola Jokic ug Gary Harris sa hinapos nga bahin aron agakon ang hosts Denver Nuggets sa 115-108 nga kadaugan batok sa defending champions Golden State Warriors kagahapon sa National Basketball Association (NBA).

Ang three-pointer ni Jokic gikan sa sipyat ni Harris maoy nakapalabaw og balik sa Nuggets, 107-104, sa nahabiling 2:10 minutos ug human niini, wala na sila motugot nga mailog sa Warriors ang bintaha hangtod na sa katapusang gutlo.

Nahimong posible ang krusyal nga three-point shot ni Jokic dihang nakalusot si Harris ug miaksyon kini paghansak sa bola apan napalakan kini ni Warriors forward Kevin Durant.

Apan ang bola nipaingon ngadto kang Jokic, kinsa nalibre sa three-point area niadtong higayuna.

“Missed, dunk, layup, pass, assist. That was huge,” matod ni Jokic. “I thought I heard the whistle because everybody stopped. I’m just going to shoot it. I’m glad I made it because I didn’t think about it.”

Human nasipyat si Curry sa iyang 26-footer jumpshot, si Jokic nakapasulod og duha ka freethrows aron inaton ang labaw sa Nuggets sa 109-104.

Wala na nakabangon ang Warriors human niini.

“It was a tie ballgame, things had gone our way to the point where Gary Harris goes up for a dunk,” asoy ni Curry.

“It was just one of those lucky kind of bounces, right to Jokic and he knocks down a 3 and he gets the crowd into it.”

Gipangulohan ni Will Barton ang Nuggets pinaagi sa iyang 25 puntos, nidugang og 19 puntos si Jokic, niamot og 16 puntos si Harris samtang nitampo og 15 puntos matag usa sila si Jamay Murray ug Trey Lyles.

Ang Warriors gipangulohan ni Kevin Durant pinaagi sa iyang 31 puntos samtang nihatag og 24 puntos si Stephen Curry.

“It was huge, especially coming off an emotional win over,” matod ni Harris.

“For us to come and get the defending world champs was huge.”

Sa laing mga duwa, ningdaog ang LA Clippers batok sa Chicago Bulls, 113-103, Detriot Pistons batok Miami Heat, 111-107, Indiana Pacers batok Philadelphia 76ers, 100-92, Washington Wizards batok Orlando Magic, 115-98, Houston Rockets batok Cleveland Cavaliers, 120-88, Minnesota Timberwolves batok New Orleans Pelicans, 118-107, Utah Jazz batok San Antonio Spurs, 120-111, ug Dallas Mavericks batok Sacramento Kings, 10699.