NAGMOTOR NAHUG SA DRAINAGE, NAMATAY
LUNGAG WA TAKUBI; DPWH, TALISAY MIBASOL SA KONTRAKTOR
Gibasol sa Department of Public Works and Highways ang kontraktor sa nagpadayong drainage project sa Barangay Bulacao, dakbayan sa Talisay diin nahulog ang usa ka motorista ug namatay niadtong Dominggo sa kaadlawon.
Kini tungod sa wa paghimo og mga pamaagi nga makabantay ang mga motorista nga magdulong sa lawom nga drainage nga gipangkawot kilid sa karsada.
Apan ang kontraktor niingon nga duna silay mga caution line nga gipamutang isip warning, apan natangtang.
Si Norman Delos Reyes, 29, taga lungsod sa Minglanilla, graduwado sa electrical engineering ug nagtrabaho sa Dakbayan sa Lapu-Lapu, nahulog sa lungag nga gikawot alang sa maong proyekto.
Si De los Reyes gikan sa trabaho ug paingon na mopauli sa ilang balay sakay sa motorsiklo dihang nahulog sa lungag niadtong Dominggo pasado alas 4 sa kaadlawon sa N. Bacalso Avenue sa Barangay Bulacao, dakbayan sa Talisay.
Si Marlon Serohijos, residente sa lugar, niingon nga kalit lang nipaka si De los Reyes dihang nahulog sa lungag nga aduna’y gilawmon pito ngadto sa 10 ka tiil.
Nag-una ang ulo ug abaga na lang ang makita uban sa iyang motorsiklo nga kagahapon pa sa buntag nakuha.
Ang mga lumolupyo sa lugar niingon nga sukad gihimo ang maong proyekto, wa sila makabantay nga adunay gihimo ang kontraktor nga pamaagi aron makabantay ang mga motorista sa lungag nga ilang gihimo.
Kon wa mahitabo ang aksidente, wa kini nila gibutangan og caution line.
Si Kapitan Raul Cabañero sa Barangay Bulacao nga nahinabi sa Superbalita Cebu diin nasakop ang nahitaboan, niingon nga naabot ang iyang gikahadlukan.
Kini tungod kay tulo ka adlaw sa wa pa ang aksidente, iyang gipatawag ang kontraktor tungod kay iyang gihangyo nga mobutang og mga pamaagi nga di kuyaw sa mga motorista, apan way gihimo.
Matod niya nga sila sa barangay wa magkuwang kay ang iyang mga tanod naka-focus sa lugar sa pagbantay sa dagan sa trapiko.
Apan panahon sa lawom nga kagabhion hangtod sa kadlawon, wala nay nagbantay nga mga tanod.
GIPAHIMANGNOAN NA
Si District Engineer Leslie Anthony Molina sa DPWH nga nahinabi sa Superbalita Cebu, niingon nga ang AR Adlawan Construction maoy nagtrabaho sa P47 milyones nga proyekto.
Matod ni Molina nga sa wa pa kini sugdi niadtong Disyembre 2017, ila nang gipahibawo ang kontraktor kon unsay buhaton aron di kuyaw sa mga motorista sama sa pagbutang og caution line ug solid nga barrier nga makababag nga malahos sa kanal.
Si Molina niingon nga ang AR Adlawan niingon nga nagbutang sila og caution line sa dapit, apan natangtang.
Wa usab sila mobutang og steel plate isip tabon kay pangkawaton.
Kagabii, ang ilang buhatan nisulti sa SunStar Cebu niingon nga moluwat ra silag pamahayag sa labing daling panahon.
Giawhag ni Molina ang kontraktor nga atimanon ang lawas ni De los Reyes ug makig-estorya sa pamilya./