Traysikad sa Colon

Ubay-ubay ang nadakpan kagahapon sa operations sa Cebu City Traffic Office (CCTO) sa ilang padayong pagpahugot sa kampanya batok niadtong sakyanan nga mag-counterflow sa kadalanan. Alas dos pa pasado pa lang gani sa hapon kagahapon, miabot na og 29 ka mga sakyanan ang nangasikop tungod sa maong violations ug kay lagi gipagawas na man ang executive order ni Mayor Tomas Osmeña, dili lang kay multa kon dili gi-impound pa yud ang mga sakyanan nga molungtad og usa ka buwan, una pa kini ma-release.

So kon makalapas ka unya ug ang imong sakyanan gamitonon alang sa imong negusyo o kaha maoy inadlawng gigamit nimo paingon sa trabaho o paghatod sa imong estudiyante, aw, natural maapetokhan ug posibling maparalisa tungod niini.

Kini ubos sa kamanduan sa Executive Order No. 034 ni Osmena nga iya ra pud nga gibase sa Republic Act 4136 o Traffic Code of the Philippines ug City Ordinance No. 801.

Giklaro sa mayor nga kadtong mo-overtake pero makabalik dayon sa iyang lane, dili mahimong dakpon. Kadto lang sakyanan nga adto mosubay sa pikas lane ug dili dayon makapahimutang og balik sa iyang posisyon ang masilutan.

Daghan ang nidayeg ning maong kamanduan kay madisiplina na yud kadtong mga abusadong driver ug dako kining matabang sa pagpahapsay sa dagan sa trapiko.

Pero yuna ra. Kon kahapsay sa dagan sa traffic ang katuyoan nganong dili man sila kabadlong o makadakop nianang mga traysikad nga magtadlas-tadlas diha sa kadalanan sa eskina Leon Kilat, Colon ug Borromeo streets haduol sa lane aron sa pagpangita og pasahero? Dugay-dugay na ni natong naobserbahan pero mora man og molingiw ra ang taga Citom niini.

Hinaot iapil unta ni ni Mayor Osmena sa pagpadakop kay otro pud ning mga abusado. Kini alang sa kaangayan.