EO 034 kuwestiyonon sa korte

Gipirmahan na sa mayor ang Executive Order No. 034 kabahin sa pagpahamtang og silot nga ipa-impound ang sakyanan kansang driver nakahimo og kalapasan nga counterflow. Ang meaning sa counterflow mao nga “going in an opposite direction.” Kanang mosugat sa nagpa-ingon nga sakyanan. Mao kini ang hinungdan sa disgrasya ug makamugna sa kahuot sa trapiko.

Mi-epekto kagahapon ang implementasyon sa maong executive order. Sa pagsuwat ning maong lindog, wala pa nato masuta kon aduna na bay nadakpan. Pero matod pa sa Citom nga istriktohon nila ang pagpatuman sa maong executive order. Andam na man gani ang ilang impounding area nga nahimutang sa South Road Properties (SRP).

Ambot kon duna bay sekwa o kalabasa sa impounding area. Kay kon naay sekwa og kalabasa sigurado man na nga mokatay sa sakyanan. Tiaw nimong usa ka buwan god na. Ang SRP naa daplin sa dagat ug bisan dili mabasa sa tubig dagat ang imong sakyanan apan tayon gihapon kini gumikan sa hinungaw sa dagat.

Unya maguwardiyahan kaha sa taga Citom ang ma-impound nga mga sakyanan? Basin inig kuha sa tag-iya human sa usa ka buwan, nahimolbulan na ang na-impound nga mga sakyahan. Kanang mga sakyanan bitaw nga na-impound sa Cebu City Police Office kay nahilambigit sa krimen, gipanguha na ang mga accessories. Gi-cannibalize na. Unya kinsa may nanguha ana, ang taga gawas o mga pulis ra usab? Aw, lampinigon lagi og kiha ang taga Citom kon mahitabo nga mangawala ang mga accessories sa ma-impound nga mga sakyahan.

Pero nganong ang sakyanan man ang silutan nga ang abusado man ngadriver maoy naka-violate sa counterflow? Dili man ang sakyanan maoy mo-counterflow ang abusado man nga driver? Adunay naghonghong kanako nga adunay grupo sa nga nagplanong mokuwestiyon ning maong executive order sa hugasdo.

Aw, mas maayo ni aron mahusay ang legalidad niini.