CCTO sa barangay

Bida ang traffic enforcers sa pagpahan-ay sa trapiko sa kadalanan ubos sa kainit sa adlaw o pagbunok sa uwan. Makasugat pa usahay og away sa mga motorista. Apan gipasidan-ang kanunay nga kalma sa serbisyo. Dili tiaw ang ilang papel. Gawas pa, kuwang ang mga enforcer sa Cebu City Traffic Office (CCTO) sa kalapad sa dakbayan ug kadaghan sa sakyanan, maatiman kaha ang tanan?

Mitumaw ang sugyot gikan sa mga yano nga lumolupyo bahin sa paghimo sa sanga sa CCTO sa matag dako o sentro nga barangay sa dakbayan ug pag-cluster sa pipila ka barangay nga dili apektado sa trapiko. Tuyo niini, matutokan pag-ayo ang pagpahan-ay sa trapiko ug pagpatuman sa mga ordinansa bahin sa kadalanan sama sa hingpit nga pagdili sa counterflow ug uban pa.

Ang pwersa sa enforcers sa sentrong buhatan sa CCTO magpabilin ug magtutok kini sa pag-ayuda sa mga dapit nga masinati ang sobra nga kahuot sa dagan sa sakyanan tungod sa aksidente, pag-agi sa mga taas nga opisyal sa kagamhanan sama sa Presidente ug ubang kalihokang sibiko ug reliyuso nga mobalda sa dagan sa trapiko.

Ang CCTO sa barangay ubos gihapon sa mando ug koordinasyon sa sentro buhatan sa CCTO mas makatutok ug klaro ang hurisdeksiyon sa matag enforcer sa iyang pag-duty aron paglikay nga matapok sa usa ka dapit samtang nabiyaan ang laing lugar nga kinahanglan sa pagtutok. Naobserahan kini sa sayong gabii nga nagkaminos na o walay presensiya sa enforcer sa sayong gabii hangtod sa lawom ngadto sa alas 10:00 sa gabii nga trapik gihapon usahay.

Wala kitay kasayoran sa plano sa CCTO, apan ang pagtukod sa sanga sa CCTO sa barangay nindot nga tun-an o kaha suwayan basin epektio ug takos nga sagupon sa ahensiya. Basin ang maayong sugyot nagagikan usahay sa sa yano molupyo nga dili batid apan naedukar sa iyang kasinatian matag adlaw.