Gilas kuwangan og praktis

Kapin na lang sa duha ka mga semana sa dili pa ikaharong sa Gilas Pilipinas ang gikahadlukang puwersa sa Australia alang sa FIBA World Cup Asian Qualifiers apan wa gihapon nakasugod ang Gilas sa giplanong kada adlaw nga praktis niini.

Nagpadayon hinuon ang matag Lunes lang nga praktis sa Gilas ubos sa paggiya ni coach Chot Reyes.

Aron makabawi og gamay sa kakuwang sa ilang pagpangandam, gipahugtan sa coaching staff ang kausa sa usa ka semana nga training sa team.

Gipaduwa ni Reyes ang Gilas batok sa iyang gidala nga team nga adunay susama og gitas-on ug gidak-on sa lineup sa Australian squad.

“Hopefully, we get them (for daily practices) starting February 12, at least one week before we leave,” matod ni Reyes nga napatik sa Spin.ph.

Gipasabot ni Reyes nga padayon siyang nakigsabot kang Philippine Basketball Association (PBA) Commissioner Willy Marcial kabahin sa plano niining kada adlaw nga ensayo.

“But again, that’s going to have to be a determination made by the PBA,” pagtataw ni Reyes.

Si Reyes naghuwat pa sab sa pag-abot ni naturalized center Andray Blatche, kinsa wala pa buhii sa Xinjiang Flying Tigers sa Chinese Basketball Association (CBA).

“The CBA, I think, will release its players only on the 12th or 13th,” pasabot ni Reyes.

“We’re trying to get his team to release him earlier, but I think the official CBA window is February 12-26, ang release ng players.”

Ang Gilas moasdang sa balwarte sa Australian team karong Pebrero 22 alang sa ikaduhang andana sa qualifiers.

Ang mga sakop sa Gilas alang ning maong tahas mao sila si June Mar Fajardo, Japeth Aguilar, Troy Rosario, Mac Belo, Gabe Norwood, Allein Maliksi, Carl Bryan Cruz, Roger Pogoy, Kevin Alas, Matthew Wright, Kiefer Ravena, ug Jayson Castro.