Mga sakyanan nga gi-impound gibalhin sa Bigfoot

Di na mainitan ug mauwanan ang mga motorsiklo ug sakyanan nga ma-impound sa City Traffic Operations Management (Citom) sanglit aduna na silay hamugaway ug adunay pandong nga storage area.

Si Mayor Tomas Osmeña nibutyag nga nisugot na ang tag-iyasa Bigfoot nga si Michael Gleissner nga adto temporaryong ipahiluna sa edepisyo nga ilang gitukod sa sulod sa 16 ka ektaryang luna sa South Road Properties.

Ang maong building para unta pagpalapad sa ilang International Academy of Film and Television apan human sa ilang katukoran, wa kini magamit sa Bigfoot.

Ang mga tag-iya nabalaka nga human unya sa 30 ka adlaw, ang ilang motor ug sakyanan daghan na og damage ug mangalaksi na ang pintal gumikan sa init ug uwan.

Si Francisco “Isko” Ouano, operations head sa Citom, nagkanayon nga hapon na silang nahibawo kagahapon ug nakabalhin na sila og duha ka private cars.

Ilang ipadayon ang pagbalhin sa mga motorsiklo ug sakyanan karong adlawa.

Ang upat ka warehouse sa Bigfoot nga adunay 1,500 metro kwadrado gibanaba nga mosulod og labing menos 500 ka mga motor ug sakyanan nga bantayan sa mga Barangay Intelligence Network.

Gipadayag ni Ouano nga posible ugmang adlawa, ila nang mahurot og balhin ang mga sakyanan nga nakalapas sa Executive Order 34 ni Osmeña nga nagsilot og 30 ka adlaw nga pagka-impound sa mga sakyanan.

Si Ouano nagkanayon nga nituhop na sa alimpatakan sa mga motorista ug nakat-on na nga dili mosugat sa sakyanan nga ilang kasugat pinaagi sa pag-counterflow aron dili masilotan.