Forgiveness
Dugay kong migakos kang Tiya. Nabatyagan ko ang iyang kamatinud-anon. Iyang gihapuhap ang akong buku-buko.
“Ang importante, Lorena, nga giangkon ni Marlene ang iyang sa’a pinaagi sa pagpangayo niyag pasaylo nimo. Di si Rowan ang laki nga angay ninyong higugmaon. Di siya kasaligan. Sure ko nga dunay laki nga para gyud nimo. Parehas nako. Si Donato ang gihatag sa Ginoo nako. Buotan ug responsable siyang pagka bana ug pagka amahan.”
Mibuwag ko paggakos kang Tiya. Gipahiran ko ang akong mga luha sa akong palad. Gipahiyoman ko ang akong iyaan. Nindot sab og smile si Tiya.
Pagka buntag, malipayon sila si Tiyo, Tiya ug Carmen nga nagtan-aw nako. Gisalig-ay ko ang akong dakong travelling bag. Nagbeso-beso mi si Carmen.
“Duaw kanunay dinhi, Gaw.”
“Ay, oo, uy. Di ko makalimot ana.”
Nagginaksanay mi si Carmen. Unya, lagsik kong migawas sa ilang balay. Gaan na kaayo ang paminaw ko sa akong kaugalingon. Morag daghang mga tunok nga naibot sa akong dughan. Hayahay na kaayo ang akong gibati. Wa na ko mahasol. Wa nay kasamok sa akong hunahuna ug kasingkasing. Sa laktod, nagmalinawon na ko.
Nagdagan si Marlene nga mipaingon nako dihang nakita ko niya nga misulod sa among lawn.
Diha diay siya sa among terrace.
“Ate Lorena!” Naghilak ang akong manghod nga migakos nako. Miginhawa kog sagunson. Ug unya, gigakos ko sab si Marlene. Mihilak sab ko.
“Saamat, Te, nga mipauli ka na sa ato ug nakapasaylo na nako.”
Mibuwag kog gakos sa akong manghod. Nagpahiyom ko niya. Nindot sab kaayo siyag pinahiyoman nako.
“Kalimtan na nato ang ngilad nga nahitabo sa atong kinabuhi, Marlene. Mag-move on ta. Usa ka dakong pagtulun-an ang nahitabo nato.”
“Oo, Te. Nakigbuwag na ko kang Rowan.”
“Maayo. Di siya ang laki nga angay natong mahalon. Duha ang iyang nawong ug di kasaligan.”
Gipislit ko ang aping sa akong manghod. Pinangga kaayo nako siya. Tungod lang sa usa ka lalaki, nawala ang maong pagmahal ko niya ug napulihan og kasilag. Apan karon, nakasabot na ko sa tanan.
Biktima lang gyud ming duha sa sayop nga gugma.
Nagkuptanay mi sa kamot si Marlene nga mipaingon kanila ni Mama ug Papa nga malipayon kaayong naghuwat kanamo sa gawas sa pultahan sa among balay.