OUANO AVE. AYUHON NA SA DPWH

Sugdan na unya sa Department of Public Works and Highways (DPWH) ang pagtrabaho sa gubaon nga Ouano Avenue, North Reclamation Area sa dakbayan sa Mandaue sunod buwan.

Kini maoy gipahibalo ni Mandaue City Mayor Luigi Quisumbing sa dihang nahinabi sa mga tigbalita ning bag-o lang.

Ang DPWH nakighimamat ni Quisumbing uban sa Traffic Enforcement Agency of Mandaue (TEAM) niadtong Huwebes aron kahatagan og update ang Dakbayan kalabot sa proyekto sa pag-ayo lakip na ang pagsuta sa mga kondisyon sa mga kadalanan sa Ouano Ave., UN Avenue, ug uban pang national roads.

“We were informed by the DPWH that there is a 6-phase project para sa Ouano Avenue for concreting, they’re going to start the concreting by the end of the month,” ni Quisumbing sa mga tigbalita.

Dugang niya nga atol sa pagtrabaho, aduna unyay parte sa Ouano avenue nga sirad-an sa mga motorista hangtod nga mahuman ang pag-ayo sa dalan.

Molungtad ang maong proyekto og usa ka tuig ug duha ka buwan, sigon sa mayor.

“This is much better because rather than patching, and relayering the asphalt, tapal-tapal ra. This is going to be complete re-concreting, re-development, the cement will be thicker than ever before. So, ang road conditions niya will be good for the next 10 to 15 years rather than the next year ra tungod sa aspalto,” ni Quisumbing mahitungod sa proyekto.

Nakaangkon og mga pagsaway gikan sa mga motorista ang kagamhanan sa dakbayan nunot sa libaong nga kondisyon sa dalan nga peligro sa mga moagi niini.

Apan giklaro ni Quisumbing nga usa ka national road ang Ouano ave. mao nga ang pundo sa pagpaayo niini naggikan sa DPWH ug di sa Dakbayan.

Paambit niya nga samtang nagpadayon ang pag-ayo sa first phase sa proyekto nga magsugod gikan sa may Cebu Port Authority, himuon unya nga diversion road sa mga sakyanan nga mopaingon sa norte, ang Zuelig ave. ug Mantawi Drive.