KANHI KAPITAN `MIKULATA’ SA BABAYE NGA ENFORCER

Kanhi kapitan ug retiradong pulis gireklamo human giingong namukbok, nanglamparo ug nanikad sa usa ka babayeng enforcer nga sakop sa City Traffic Management System (CTMS) sa dakbayan sa Lapu-Lapu niadtong Biyernes sa hapon.

Giingong nasuko ang kanhi opisyal human gibadlong ni Era Navarro, 39, enforcer, taga Brgy. Babag sa dakbayan, sa dihang nihunong og dugay sa no stopping zone atubangan sa Pusok Public Market sa MC. Quezon Highway sa maong barangay.

Giila ang kanhi kapitan nga si Fernando Cahilog, 63, minyo, kanhi kapitan sa Brgy. Ibo, Lapu-Lapu ug bana sa kasamtangang kapitan sa maong barangay.

Base sa imbestigasyon sa Station 5 sa Lapu-Lapu City Police Office (LLCPO), nasuta nga pasado alas 3 sa hapon niadtong Biyernes, nagbantay si Navarro sa trapiko atubangan sa merkado.

Matod ni SPO3 Roberto Pepito, imbestigador sa maong kaso, nga nakit-an ni Navarro ang sakyanan sa suspek nga nihunong sa no-stopping zone.

Dugang ni Pepito nga sa pagtuo nga aduna lay pakanaugon o pasakyon ang maong sakyanan, gihatagan una kini sa biktima og 10 minutos aron makahunong sa dapit.

Apan natingala si Navarro human ang maong sakyanan nag-urong lang human sa 10 minutos nga iyang gitagal maong iyang giduol.

Mga usa ka metros nga gilay-on niya sa sakyanan, may nakita si Navarro nga tawo sa driver’s seat maong iyang gituktok.

Pag-abli sa sakyanan, iyang giingnan ang drayber ni Cahilog nga mohawa na sa dapit sanglit usa kini ka no-stopping area.

Apan gitubag, matod pa sa drayber, si Navarro og “Kaila ka kinsa ni akong tapad?”

“Kinsa man diay na siya?” tubag ni Navarro sa drayber.

Si Pepito nagkanayon nga human sa pangutana ni Navarro, kalit nga nigawas sa sakyanan si Cahilog ug gikomprontasi si Navarro.

“Wa ka kaila nako, retired police ko?!,” giingong singgit ni Cahilog kang Navarro. Matod ni Pepito nga human niadto, kalit nga gibukbok ni Cahilog ang buko-buko ni Navarro ug gilamparo niini ang nawong.

Giingong wa pa makontento si Cahilog ug iyang gipatidpatiran si Navarro sa makadaghang mga higayon bisan kini nirason nga usa ra siya ka yanong enforcer ug igo lang niya gibuhat ang iyang trabaho.

Human sa insidente, si Pepito nagkanayon nga nisutoy og dagan ang sakyanan ni Cahilog palayo sa dapit.

Sa dihang gikuhaan og habig ning mantalaan, si Kapitan Mary Jane Cahilog, asawa sa suspek, kini nagkanayon nga wa siyay nahibaw-an kalabot sa insidente.

Dugang niya nga iya unang pangutan-on iyang bana kalabot sa insidente. “I cannot speak for my husband. Ang iyang kamot ana sa pagkakaron hubag karon kay naay arthritis,” ni Cahilog sa phone interview sa Superbalita Cebu. Paambit niya nga kagawasan ni Navarro nga moreklamo.

Nasuta sa Superbalita Cebu gikan ni Pepito nga si Cahilog gireklamo na og panapat.

Na-blotter kini sa ilang estasyon niadto human giingong nakapasakit og menor.

Dugang niya nga aduna sab kini nag-ung-ong nga warrant sa korte.

Human sa insidente, si Navarro daling nipatan-aw sa iyang bun-og sa tambalanan.

Ang biktima mopasaka og kasong direct assault batok sa suspek ugmang adlawa.