Dili na pasudlon sa CSBT

Gitagalan sa tagdumala sa Cebu South Bus Terminal ang mga trabahante sa mga kompaniya og bus hangtod sa Pebrero 28 sa pagduso sa resulta sa drug test ug police clearance.

Si Jonathan Tumulak, security manager sa CSBT, nibutyag nga dili nila pasudlon sa terminal sugod sa Marso 1 ang mapakyas sa pagbuhat niini.

Matod niya ang pagpaubos sa mandatory drug test ug pagsumitir og police clearance nauyonan nila atol sa tigom uban sa mga operator og bus ug Land Transportation Office.

Ang Cebu Provincial Bus ug Mini-bus Operators Cooperative nipaluyo sa maong lakang sa management sa CSBT.

“Dili nato sila padraybon, dili nato sila padutihon unless maka-submit ni sila sa ilang result,” pasalig ni Julieto “Julie” Flores, presidente sa CPBMOC, ug konsehal sa lungsod sa Barili.

Si Tumulak namahayag nga ilang kining gibuhat aron maseguro nga way tiggamitan og gidili nga drugas sa mga drayber, conductor ug ubang mga trabahante sa bus companies.

Apil sa drug test ug pagduso og police clearance ang mga helper, dispatser ug comptroller sa mga kompaniya og bus.

“Para way outsiders makasulod jud sa terminal. Ang endorsement sa operators mao nay kamatuoran nga trabahante na og bus company... Para kami sa among bahin, naay idea sa ilang mga trabahante nga gi-authorize na nila nga patrabahuon, makasud sa terminal,” dugang ni Tumulak sa Superbalita Cebu.